Il suveran ha decidì ils 21 da favrer da vulair restar en il Parc Ela. La ferma opposiziun haja dentant fatg cler ch'i saja er en avegnir d'avair quità dal territori da skis e las pendicularas sco center turistic.
La TSBA aveva vulì restar en il parc, be sch'il territori da skis vegniss exclus dal Parc Ela. Sa chapescha ch'els acceptian dentant la decisiun dal suveran da vulair restar. Malgrà ch'ella ha pers, vul ella dentant che l'opposiziun survegnia ina vusch en chapitel.
Peder Plaz sco nov suprastant
Nagin tema è stà ch'il president da l'organisaziun turistica, Luzi Thomann duai sa retrair. La suprastanza communala ha proponì Peder Plaz sco successur da Carmen Dedual per la suprastanza da l'uniun Parc Ela. Questa proposta sustegna er la TSBA. Quai sur tut pervi da ses connex cun l'economia. Entras el fissan er ils interess da mastergnanza ed economia represchentads en la suprastanza dal parc.
La TSBA ed er la suprastanza communala Surses hajan manà in discurs avert. Malgrà las differenzas vegnian las pendicularas a restar en la TSBA ed er a pajar vinavant lur contribuziun annuala a favur dal marketing. L'avegnir e la bainstanza da la regiun sajan quai che collia e che la TSBA sco er la vischnanca hajan en mira.
