Siglir tar il cuntegn

Header

cuntegn

Iniziativa surmiran en scola Suprastanza da Surses vul restar tar rumantsch grischun

La suprastanza communala ed il cussegl da scola da Surses han decidì, da betg sustegnair l’iniziativa che vul reintroducir il surmiran en scola. Ina cuntraproposta n'è betg planisada.

En discussiun steva da suttametter a las votantas ed als votants ina cuntraproposta, ch’avess per exempel previs d’instruir en la scola primara surmiran e midar en la scola superiura tar il rumantsch grischun. Da far in tal masdigl da linguas vegn però scusseglià, tant da la magistraglia sco era da l’inspecturat da scola. Per tala raschun haja la suprastanza da Surses decidì da desister da far ina cuntraproposta, scriva la vischnanca en ina communicaziun.

Saira d'infurmaziun avant ch'i vegn decidì

Avant ch’il suveran decida a la radunanza communala davart l’iniziativa, dettia anc ina saira d’infurmaziun cun ina discussiun da podium. Uschè spert che la situaziun en connex cun il coronavirus lubeschia puspè occurrenzas pli grondas, vegnian realisads ils dus termins.

Iniziants giessan pli gugent a l'urna

audio
Ils iniziants cunter il rumantsch grischun vulan votaziun a l'urna
ord Actualitad dals 30.04.2020.
laschar ir. Durada: 3 minutas 25 Secundas.

Simon Bergamin, il pledader dal comité d’iniziativa «per noss rumantsch Surmiran» avess beneventà, sche la vischnanca da Surses giess davant l’urna cun l’iniziativa. I saja memia intschert, cura che l’iniziativa possia ir en votaziun, cun quai ch’ins na sappia il mument betg cura che infurmaziuns publicas e radunanzas communalas possian puspè vegnir manadas tras pervia dal coronavirus. Il comité vegnia franc anc ina giada intervegnir tar la vischnanca da Surses, ha ditg Bergamin envers RTR.

Vischnanca vul ina discussiun

Era sche la regenza ha decidì, che fatschentas urgentas pudessan ir davant l’urna empè davant la radunanza communala èsi cler per la vischnanca ch’ella vul tegnair ferm vi da la radunanza communala. La suprastanza communala giuditgeschia l’iniziativa dal pievel betg sco urgenta, plinavant saja fitg impurtant ch’il pievel possia discutar davart il pro e contra. Mo publitgar in messadi na tanschia betg, scriva Leo Thomann en in mail. El speria ch’ins possia anc avant las vacanzas da stad manar tras la radunanza communala ed in'infurmaziun publica cun discussiun da podium, uschia ch’i tanschess anc adina tar in gea a favur da l’iniziativa, da preparar ils meds d’instrucziun sin l’entschatta da l’onn da scola 2021/22.

Ord l'archiv

video
Surses – l'idiom duai returnar en scola
Or da Telesguard dals 24.05.2019.
laschar ir. Durada: 2 minutas 57 Secundas.

RTR novitads 06:00

Artitgels legids il pli savens