Roman Sommer, il president dal cussegl d’administraziun dal Museum da viafier Alvra, ha ditg che la viafier da model duai vegnir construida en trais etappas. Cumenzà duess vegnir cun lavurs da conturn e lura cun la construcziun dal model da la viafier da l’Alvra, suandada da la viafier dal Bernina.
-
Bild 1 von 5. Skizza da la viafier da model. Bildquelle: RTR.
-
Bild 2 von 5. La viafier da model vegn construida gist sut il museum. Bildquelle: RTR.
-
Bild 3 von 5. Sin quest prà davos il Museum da viafier vegn la viafier da model contruida. Bildquelle: RTR.
-
Bild 4 von 5. Roman Sommer, il president dal Museum da viafier Alvra. Bildquelle: RTR.
-
Bild 5 von 5. Tals models en la dimensiun da 1:22,5 duessan cursar sin il traject da la viafier da model. Bildquelle: RTR.
In emprim viadi d’emprova è planisà per il giubileum da 125 onns viafier da l’Alvra l’onn 2028. La sfida principala sajan las cundiziuns da l’aura sco naiv e scheliras, che fan pretensiuns spezialas a la construcziun. Il viaduct da la Landwasser vegn per exempel construì sco model da 2,88 meters autezza. La cuntrada vegn concepida uschia, che las visitadras ed ils visitaders pon vesair bain ils trens.
Dus terz da las investiziuns èn garantids
Roman Sommer accentuescha che l’engrondiment saja impurtant per il museum, per pudair porscher in’attracziun dapli en l’avegnir. Il museum che ha registrà l’onn passà in record da visitadras e da visitaders cun passa 26’000 entradas. Cun l’avertura da la nova viafier da model spera il museum da pudair augmentar las entradas sin 36'000 ad onn. Dals 1,1 milliuns francs calculads èn segirads dus terzs. Ils 250'000 francs che mancan duain vegnir finanziads da donaturs privats e da fundaziuns. La dumonda da bajegiar tar la vischnanca da Bravuogn Filisur duess vegnir inoltrada la fin d’avust.