Atgnamain quintava l’interpresa che maina ils implants da sport da Bravuogn ch’i giaja almain dus envierns, fin che l’investiziun en la palera ed in automat da pajar la taxa saja amortisada. Niculin Josty di ch’i saja fitg allegraivel che l’investiziun da radund 100’000 francs en l’indriz saja ussa gia suenter l’emprim enviern amortisada. Quai sajan daners che sajan bainvegnids per investiziuns en ratracs u en la segunda secziun da la sutgera da Darlux, ha ditg Josty. Tut en tut haja il nov indriz funcziunà bain. Sporadicamain haja dentant dà intgins problems cun bigliets ch’il sistem n’enconuscheva betg.
Gia daditg tschertgà ina soluziun
Sco quai che Josty ha ditg plinavant, hajan ins gia daditg tschertgà ina soluziun da controllar las scarsoladras ed ils scarsoladers. Tar controllas sporadicas hajan ins mintg’onn constatà ch’i deva adina puspè persunas cun in abunament general che n’hajan betg pajà la taxa che custa quest enviern 7,50 francs per mintga viadi. Cun quest nov sistem possian ins ussa garantir che tuttas e tuts pajan la taxa necessaria.
