La situaziun da partenza è la suandanta: Dal 1963 fin il 2004 ha La Societad da consum Alvra/Surses manà a Sur ina filiala dal Volg. Il medem onn ha il vischnanca da Sur disdì il contract cun la societad, fundada è vegnida la cooperativa «Nossa butia». Manà è il negozi vegnì sin agen quint da la cooperativa. Igl è adina stà in cumbat permanent per star sur l'aua quai che pertutga las finanzas.
Avant tschintg onns ha l'organisaziun «Nossa butia» fatg la dumonda a la Societad da consum Alvra/Surses, sch'ella surpigliass la butia a Sur. La cundiziun è stada che la vischnanca da Surses surpiglia in deficit eventual da la butia. Quai è lura er stà il cas, la butia ha scrit cifras cotschnas da radund 30 000 francs per onn. Il vischnanca da Surses è sa decidida en il decurs dal 2025 da betg pli surpigliar il deficit. Uschia è la Societad da consum Alvra/Surses vegnida a la conclusiun da serrar a la fin da december 2025 la butia Prima a Sur, perquai che quella na renda ed ha era memia paucs clients.
In flyer cun pliras dumondas
Gia a la saira d'infurmaziun da la vischnanca da Sur e da la Societad da consum Alvra/Surses èn las emoziuns pertutgant la serrada da la butia a Sur sa mussadas en pliras furmas. Dalunga è er sa furmada ina gruppa d'interess per mantegnair la butia cun pliras persunas indigenas sco per exempel Victoria Spinas, Gabriela Spinas, Letizia Signorell ed Erika Tanner. Er ferm engaschads per il project èn Hansruedi Berger, Thomas Nyffeler e Werner Erb.
Dapi curt cursescha a Sur ed er en las vischnancas vischinas in flyer cun il titel «La butia Sur». Per avrir la butia il mars 2026 vuless la gruppa d'interess enconuscher l'opiniun da la populaziun da Sur, da giasts e da segunddimortants pertutgant ils products che duessan vegnir vendids en la nova butia ed er tge products ch'i dovra per ina butia da vischnanca.
Fitg impurtant – na dovri betg
Grazia al questiunari duai esser pli simpel per la gruppa d’interess da cuntinuar cun la lavur e da persequitar vinavant il project. Da respunder ha mintga participant e mintga participanta pliras dumondas. Tranter auter vulan ins savair sch'igl è fitg impurtant e bel d'avair vinavant ina butia en vischnanca. I dat era la pussaivladad da marcar ch'i na dovria betg ina butia. Plinavant datti era la pussaivladad da sa participar al project cun donaziuns, investiziuns u era lavurar en la butia.
Da gronda impurtanza na saja betg mo ina butia en vischnanca, mabain era d'avair in lieu d'inscunter sco il Bistro che tutga gia uss tar la «Nossa buteia». Planisà è ina stizun averta 24 uras e durant set dis.