Hubert Weibel daventa il nov president communal da Ferrera/Schmitten. Weibel, ch'era gia stà president enfin il 2021, entschaiva l'uffizi il schaner che vegn e succeda a Marc Fürsinger che dat giu il presidi per raschuns persunalas.
Per las lavurs da fusiun na munta quella midada en suprastanza betg in problem, ha l'Uffizi chantunal da vischnanca ditg sin dumonda. Hubert Weibel ha gia pli baud en ses temp d'uffizi persequità ina eventuala fusiun cun Tavau. El è era stà quella persuna ch'ha instradà che la scola da Schmitten possia ir a Tavau e betg en il consorzi da scola Alvra.
In ulteriur deficit
Cun l'invit a la radunanza communala dals 27 da november è era vegnì preschentà il budget per il 2026, ch'è vegnì approvà da la radunanza communala. Ins quinta cun in deficit da 250'000 francs ed investiziuns nettas da quasi 100'000 francs. Uschia quint'ins a Schmitten cun in ulteriur quint negativ. Il pe da taglia resta.
A la vischnanca da Schmitten – che sa chatta tranter la Val d'Alvra e la regiun da Tavau – stat l'aua fin al culiez. Per pudair far las investiziuns necessarias manchian mintg'onn 250'000 francs. Plinavant vegnan las reservas d'agen chapital ad esser duvradas en il pli tard dus onns, quai han ils responsabel ditg schon pli baud.
Las midadas a la testa da la vischnanca da Schmitten n'hajan nagina influenza sin ils divers pass per ina fusiun, ha ditg l'Uffizi chantunal sin dumonda. I vala da preparar ed examinar ils singuls pass per ina fusiun – far prescha n'haja nagina prioritad. Realistic saja en cas optimal ina fusiun che va en vigur il pli baud entschatta 2027, pussibel saja dentant er ina fusiun entschatta 2028.
