Davent da l’entschatta da l’onn enfin oz haja el fatg l’experientscha che sco mastral saja simplamain da metter prioritads. Da grond’impurtanza saja da vesair tge affars che sajan urgents e tgenins che sajan main urgents da vegnir liquidads.
80% pensum mo sin il palpiri
L’uffizi da president è ina plazza dad 80%. Maurin Malär ha ditg ch’el lavuria tranter 45 e 55 uras l’emna per la vischnanca da Vaz. Bun 35% cumpiglia ses pensum da lavur strategic, s’occupar cun l’avegnir ed avair in plan per vegnir tar tschertas finamiras. 25% dal pensum saja lavur operativa, vul dir manar la direcziun ed administraziun da la vischnanca. 20% da ses pensum saja lavur da represchentaziun tar occurrenzas da tut gener.
Projects pli gronds
Divers projects pli gronds èn en elavuraziun a Vaz. Uschia duess vegnir construida a Lai ina nova chasa d’attempads. Anc quest onn duess vegnir votà a l’urna per far ina midada da zona per realisar il nov bajetg per attempads. Era il plaz da sport duess daventar pli concret, di il president. In tema è era in project per abitaziuns per indigens e persunal. Blera lavur spetga anc quai che pertutga la planisaziun dal territori e la planisaziun locala. Era il model da direcziun daventia in tema, e la collavuraziun cun las pendicularas da Lai.
Il pli giuven è vegnì elegì
A la fin d’avust 2021 ha il suveran da Vaz elegì Maurin Malär sco successur dad Aron Moser e nov president da la vischnanca da Vaz. Per la successiun dal president devi cun Ueli Pircher, Kaspar Jörger e Maurin Malär trais candidats per l’uffizi dal president. Il suveran da la pli gronda vischnanca surmirana ha elegì cun Maurin Malär la pli giuvna persuna da quellas trais, e damai sa decidì per la giuventetgna empè per l’experientscha. Manegià saja qua Kaspar Jörger cun 64 onns. Maurin Malär, l’um da 31 onns ha survegnì 513 vuschs e fatg gist tschintg vuschs dapli che la maioritad absoluta. Kaspar Jörger ha survegnì 307 vuschs ed Ueli Pircher è vegnì sin 194 vuschs.
Nagin noviz politic
Maurin Malär è entrà en uffizi il prim da schaner 2022 suenter avair gì in mais invista en ils affars da la vischnanca da Vaz, cun Aron Moser, il president communal partent. Politicamain è Maurin Malär nagin noviz. Durant quatter onns è el stà en il parlament da Vaz ch’el ha presidià durant in onn.
