Dals 9 fin ils 12 d'avrigl ha lieu per la davosa giada la higa en la halla da la citad da Cuira, avant che l'occurenza mida en la nova halla d'events Areon tar l'Obere Au.
Sco finiziun dettia ina purschida vasta, scriva la higa en ina communicaziun: sin il program èn tranter auter in duel da cuschinar tranter politichers e politicras grischuns, nua ch'i vegn er discutà davart temas politics. Plinavant datti ina purschida per glieud activa cun in parc da raiver sin sugas. E per l'emprima giada daventa la higa er in local da notg. L'anteriura cuschina da la halla da la citad vegn midà en in club. Quel è mintgamai avert da las 22:00 fin las 03:00.
Il 2024 è la «Higa» turnada
L'exposiziun da commerzi, industria e mastergn «Higa» datti dapi il 1957. L'idea era sco oz er da dar a la mastergnanza ina plattafurma per sa preschentar. Ma suenter la pandemia ha l'exposiziun cun il num «Grimavera» remplazzà la «Higa». La citad da Cuira, sco organisatura, ha suenter quella emprova puspè laschà organisar persunas privatas l'exposiziun da primavaira. Per l'ina n'haja la citad mai previs d'organisar a lunga vista ina tala exposiziun, per l'autra hajan ins spetgà dapli da la «Grimavera».
Suenter corona è anc vegnida annunziada in'ulteriura exposiziun, la KHUGA, ch'è sa focusada sin il mastergn local da Cuira. Quella ha gì lieu dals 18 fin 21 da matg 2023, fin uss la suletta giada. Parallel cun questa fiera hai er anc dà la fiera Imboda a Domat.