En Svizra datti gia plirs chantuns cun ina tala purschida. Er auters pajais en Scandinavia han pudì far bunas experientschas. Cun ils tractaments a chasa datti plirs avantatgs per l'ospital chantunal. Per exempel en la stagiun d'enviern cura che l'ospital è sez gia plain, pon ins lura spargnar resursas, sch'ils pazients n'occupan betg ina stanza mabain èn a chasa.
Nus quintain cun in respargn da custs da 10-15%.
Suenter la fasa da test da dus onns vegn lura fatg bilantscha e guardà, sche l'offerta sa renda e vegn era nizzegiada. Tut tenor fiss quai lura er in concept per ils ospitals regiunals dal chantun.
Emprimas experientschas han ins uss gia pudì far ils ultims mais. Tranter auter è il medi superiur Gieri Maissen in da quels che va sin visita a chasa tar tals pazients. El è persvadì che hospital@home po schizunt procurar per ina meglra diagnosa dal tractament dal pazient. La vita privata po numnadamain er avair in effect sin las decisiuns ch'ils medis fan.
Tuttina èsi da savair che betg mintga pazient è adattà per la purschida da hospital@home. Il pazient sto esser clinicamain stabil, quai vul dir nagin privel ch'el dovra tgira intensiva. Lura ha il pazient era d'esser autonom avunda per pudair ir sulet sin tualetta e cuschinar u ch'el ha a chasa ina persuna che sustegna el.