Entschatta mars è sin territori rural da la vischnanca da Cuira vegnì chattà in utschè mort en ina posiziun nunusitada. L’utschè, probablamain in corv, era fermà vi dad ina construcziun da lain or d'ina pitga e d’ina latta da lain fixada orizontalmain cun liacabels.
Al lieu eran visiblas numerusas plimas, ed in dals pes dal corv era gia sa distatgà – sco ch'igl è da vesair sin fotografias ch'èn vegnidas mess a disposiziun a RTR.
Persunas privatas han infurmà la polizia, ch'ha examinà la situaziun al lieu e contactà in guardiaselvaschina.
L’Uffizi da chatscha e pestga dal Grischun ha confermà sin dumonda da RTR ch'ina annunzia correspundenta saja arrivada tar l'uffizi. Il corv saja vegnì exponì nunlubidamain sco estga per carmalar animals per la chatscha da lajetg.
Tge è insumma lubì tar la chatscha da lajetg? Las respostas dat Lukas Walser, manader da la partiziun selvaschina e chatscha tar l’Uffizi da chatscha e pestga dal Grischun.
RTR: Sut tge circumstanzas èsi lubì da carmalar selvaschina?
Lukas Walser: Carmalar la selvaschina è lubì be durant la chatscha da lajetg. Quai vala per vulps, tais e tschertas fiergnas (ultra da quai er ils animals betg indigens/invasivs sco chaun-vulps, ursets americans e ratuns da bisam).
Co ch'i dastga vegnir carmalà è fixà en las prescripziuns da chatscha. I na dastgan betg vegnir mess ora cadavers u parts da cadaver d'animals da niz u da selvaschina sajettada. Restanzas da charn e da peschs ston vegnir repartidas uschia ch'ellas pon vegnir magliadas mo en purziuns pli pitschnas.
Datti distanzas minimalas ch'ins resguardar per la chatscha en vischinanza d'abitadis?
La chatscha da lajetg contribuescha considerablamain a la reducziun da conflicts cun animals da rapina sco vulps, tais u fiergnas en territoris d'abitadi ed en l'agricultura. Perquai po la chatscha da lajetg esser raschunaivla en la vischinanza d'abitadis u da manaschis agriculs. En la lescha na datti dentant naginas distanzas minimalas, mintga lajetg vegn dentant examinà e permess da la surveglianza da chatscha.
Avant lubir vegnan resguardads conflicts eventuals cun abitadis u per exempel er vias da spassegiar. En cas da conflicts potenzials na vegnan quels lajetgs betg permess.
Quant realistic èsi che las autoritads percorschan cuntravenziuns?
Tut ils lieus da la chatscha da lajetg èn enconuschents a la surveglianza da chatscha e vegnan controllads periodicamain u en cas da suspect da cuntravenziuns. Sch' i vegnan constatadas cuntravenziuns, vegn quai chastià tut tenor cun ina multa disciplinara u cun ina denunzia.
Cun tge consequenzas sto in chatschader quintar sch'el carmala illegalmain la selvaschina?
Quai dependa fermamain dal cas. Tut tenor dimensiun da cuntravenziun è la consequenza ina multa disciplinara u ina denunzia a la procura publica. Ultra da quai po il lajetg vegnir mess ord funcziun da tut temp tras la surveglianza da chatscha.
Quant savens vegnan annunziads u persequitads tals cas en il chantun Grischun?
I sa tracta da paucs cas singuls. Las chatschadras ed ils chatschaders sa tegnan da princip fitg bain vi da las prescripziuns ed èn conscients da la sensibilitad da quest tema.
En il cas actual na po Lukas Walser betg dar bleras infurmaziuns. Ins ha pudì identifitgar il chatschader responsabel. Sin el spetgan sancziuns che pon tanscher d'ina multa fin ad ina denunzia tar la procura publica.
Sch'il chatschader ha gia pendì si il corv per la chatscha da lajetg terminada la fin da favrer u sch'el ha er sur quest temp ora vulì sajettar vulps, resta avert. Cler è dentant: talas metodas èn illegalas – ed ellas restan l'excepziun e betg la regla.