Il privel d'incendis da guaud è questa stad stà in grond tema en il Grischun. Il terren è savens stà sitg. Per stizzar a temp incendis da guaud dovri dapertut avunda reserva d'aua.
En territoris da skis grischuns ed en autras parts da las Alps servan ils indrizs da far naiv betg mo per far naiv, mabain era per furnir aua en cas d'in incendi da guaud. Quai di Conradin Caduff, l’inspectur da pumpiers grischun. Ina gronda rolla giogan ils lais artifizials che furneschan l'enviern aua per ils chanuns da naiv. Quels pon vegnir duvrads da helicopters per ir svelt e per blera aua da stizzar.
Privel d'incendis da guaud en il Grischun
Lingias d’aua èn nizzaivlas
Betg mo ils pools cun aua per far naiv hajan in niz, ma era las lingias d'aua che mainan da quels lais fin tar ils chanuns da naiv. Ma quellas na pon betg simplamain vegnir colliadas cun in uder da pumpiers. Lur pressiun fiss memia gronda e sto l'emprim vegnir sbassada per colliar ils uders dals pumpiers, di Conradin Caduff.
Fin uss n'han ins tenor mes savair anc mai stuì duvrar l'infrastructura da far naiv per stizzar in incendi da guaud.
Er las pendicularas hajan in interess ch'in incendi da vegetaziun en lur territori possia vegnir stizzà uschè svelt sco pussaivel.
Che las reservas d'aua èn decisivas sch'in incendi da guaud po vegnir stizzà ad uras han ins vis fitg bain la fin matg a Cuira, cura ch'il guaud sur la citad ha ars ed ha pudì vegnir stizzà entaifer fitg curt temp cun dus helicopters ch'han prendì l'aua directamain or d'in lai artifizial sin il Mittenberg. Quest pool è vegnì construì il 2020, precis cun quest intent: da stizzar uschè svelt sco pussaivel in incendi da guaud.
Or da l'archiv: