Durant blers onns eran ils martgads in punct d’inscunter popular per indigens e turists ed offrivan ina plattafurma per spezialitads regiunalas en in ambient alpin. Ma las cundiziuns èn sa midadas: blers producents na chattan ozendi strusch pli il temp per esser preschents sin ils pass, surtut pervia dals lungs viadis e da la gronda sfida logistica. La manadra da l’organisaziun purtadra, Alpinavera, declera ils motivs suandontamain.
Surtut ils custs da persunal, ils lungs viadis e ch’igl è grev da planisar è ina gronda sfida per ils producents.
En il medem mument han novs chanals da vendita survegnì dapli impurtanza. Blers manaschis vendan lur products cun success tras shops d’online. La relevanza d'avair ina fiera digitala è creschida marcantamain.
Avant in pèr onns saja quai anc stà pli pauc il cas. Ussa haja la fiera digitala gudagnà impurtanza. In motiv central per quest svilup saja la midada da generaziun. La generaziun veglia che ha sur onns producì ed augmentà la purschida da products regiunalas surdat pli e pli il manaschi a la generaziun giuvna. Ed ina nova generaziun munta era ina nova moda da far fatschenta, sco Jasmine Said Bucher declera.
La nova generaziun sa focusescha pli fitg sin ina purschida digitala ubain era sin il commerzi cun fatschentas grondas.
L’Alpinavera è pertscherta da quest svilup e tschertga ussa ensemen cun ils producents e las producentas giuvnas novas strategias per far pli enconuschent ils products regiunals.
In focus schai cler sin la purschida digitala, sco per exempel sin chanals da social media e shops d’online. In'auter focus saja dad intensivar il commerzi cun fatschentas grondas. Finamira fissi per exempel ch'il Coop vendess dapli products locals en lur filialas regiunalas sut la lingia da «Pro Montagne». Il medem vala per la Migros, Aldi u Lidl. E tuttina: dal tut svanir na duessan las fieras localas betg. Quai saja e restia vinavant ina impurtanta plattafurma cunzunt per producents pitschens.
Or da l'archiv: