Sco Fabian Collenberg declera, è il martgà da lavur sa midà fermamain ils ultims onns, betg mo en las administraziuns communalas, mabain en general. La tschertga da persunas qualifitgadas è daventada pli greva, perquai che bleras plazzas – era en las administraziuns communalas – èn ozendi pli cumplexas che pli baud. Ultra da quai po il lungatg en regiuns ruralas esser ina sfida supplementara per recrutar persunal.
La transfurmaziun digitala daventa adina pli impurtanta per las vischnancas. Schebain ils commembers e commembras pli veglias da l’administraziun prefereschan savens metodas tradiziunalas, èn ils giuvens pli averts per midadas. Quai po pussibilitar svilups innovativs.
Il sectur da construcziun sut pressiun
Ina ulteriura sfida per las vischnancas è il sectur da construcziun, che ha subì grondas midadas ils ultims onns. Collenberg accentuescha l’impurtanza d’innovaziun e da qualitad per garantir ina buna qualitad da viver en las vischnancas. Persistenza, qualitad da viver ed innovaziun restan facturs centrals per il success futur da las vischnancas.