Per quai vai: Cuntinuar sco enfin ussa na va betg, uschiglio s'accentueschia la mancanza da medias e medis ed i dat rusnas en il provediment. Gia oz datti memia paucas medias da chasa, medis d'uffants, psichiatras u ginecologas. Per quai datti differents motivs, per exempel è il dumber da plazzas da furmaziun sco medi u media limità. Plinavant lavura la nova generaziun da medis pli gugent a temp parzial en praticas da gruppa che sulet en ina pratica cun emnas da lavur da 80 uras.
Quai duai sa midar: I dovra dapli plazzas da scolaziun e da furmaziun supplementara, malgrà las stentas fin uss. L'ultim decenni è il dumber da diploms bunamain sa dublegià, sin stgars 1'400 l'onn 2024 (Program spezial «medischina umana» da la Confederaziun, dals chantuns e da las scolas autas).
Ultra da quai vul il chantun Turitg stgaffir ulteriuras plazzas da studi dad actualmain 430 sin 700 a partir da l'onn 2030. Actualmain han lieu discurs per rinforzar il provediment medicinal da basa. Ed en tut la Svizra duai l'examen d'admissiun per il studi da medischina vegnir midà uschia che las persunas las pli adattadas vegnian promovidas.
Èn vegnids tschernids ils «fallads»? Tgi che vul studegiar medischina en Svizra, sto passar l'examen d'admissiun, il Numerus Clausus. Perquai che las plazzas da scolaziun èn limitadas. Ma da tut ils medis e medias cun diplom il 2018 n'era tschintg onns pli tard mintga setavel u otgavel betg pli en la professiun.
Il test da qualificaziun na persvada betg. El examinescha las abilitads cognitivas e na di ora nagut davart las abilitads ch'èn pli tard impurtantas en la professiun, sco la cumpetenza sociala e l'intelligenza emoziunala.
L'examen d'admissiun duai ussa vegnir adattà.
Cun in diplom ester: Perquai che la Svizra scolescha sezza memia paucas medias e medis, accepta ella medias e medis cun in diplom ester. Quel dumber è creschì cleramain sin fin a 41% l'onn 2024. Quai vul dir: quasi mintga segund medi, mintga segunda media vegn da l'exteriur e manca là.
Era mancanzas en il Grischun
Er en il Grischun mancan medias e medis. Cumpareglià cun autras regiuns ruralas è questa mancanza dentant plitost pli pitschna, co ch'ins vesa en la statisticas da medis da la FMH da l'onn 2023. Malgrà il fatg ch'il dumber da medias e medis crescha en il Grischun, discurr'ins d'ina mancanza.
Meglier ch'en autras regiuns: Entant ch'i dat en regiuns periferas en auters chantuns main medias e medis da chasa sin 1'000 abitants, pli exact: 0,5 fin 0,8 medias e medis per 1'000 abitants, han grondas parts dal Grischun dapli medias e medis da chasa per 1'000 abitants (0,9 fin 1,2). Quai mussa la statistica da medis FMH 2023.