Igl è nov onns che la famiglia Gutsche ha cumprà ina chasa veglia gist sur il consum da Maton. Ussa stat là enstagl da lezza chasa ina nova e moderna. Michael Gutsche è in um sportiv, el enconuscha la vischnanca gia dapi passa 30 onns. Da lez temps visitava el la Muntogna da Schons per ir a far turas da skis. «Sche jau guarda qua or da la fanestra, sun jau cuntent», raquinta el. Enturn ed enturn en da vesair las muntagnas da la regiun.
La vista è impressiunanta or da las grondas fanestras da l’avdanza. «La mia finamira era d'ascender mintga piz ch'jau ves or da mia fanestra. Quel hai jau cuntanschì da curt – il Piz Por è stada la davos'ascensiun», raquinta el cun egls targlischants. Mez da l'onn viva Michael Gutsche en la Germania, datiers da Würzburg. L’autra mesadad passenta el en la Val Schons. Per el munta quai passa 5 uras e mez per mintga viadi.
Formats gigantics
Ma l’ir a far turas da skis n'è betg la suletta passiùn da Michael Gutsche. Era sche l’um da 64 onns n'ha betg fotografà sia entira vita, ha el gia baud tschiffà tschaffen dal fotografar. Suenter l'abitur ha el studegià economia ed ha lura lavurà onns a la lunga sco CEO d’ina firma che sa fatschenta cun la protecziun da l'ambient.
Fotografà ha el gia adina gugent, ma il temps mancavia. I'onn 2011 ha el gughegià da far il pass per sa far independent. Ils expositurs da gronds museums han dalunga remartgà, che Michael Gutsche n'è betg in fotograf sco auters. Ses maletgs mussan mintga fin detagl, er en formats gigantics.
En sia avdanza a Maton mussa el ina da sias ilustraziuns da ses pli nov project «Viamala». Jau ves in purtret dad 106 par 139 centimeters – per Michael Gutsche in format pitschen – che mussa ina part da la chavorgia l'enviern da l'onn passà. Scadina chandaila da glatsch, mintga singul cristal da naiv e mintga piculezza è da vesair.
Franz Gertsch (1930 – 2022) da Riggisberg, in anteriur pictur e graficer svizzer fetg enconuschent, inspirescha Michael Gutsche gia dapi onns. El malegiava en formats gigantics. Sias ovras parevan sco fotografeias, maletgs fitg detagliads – pia in pau sco las ovras fotograficas da Michael Gutsche.
Premis internaziunals
En lieus prominents sco en il Museum da Communicaziun a Berlin u en la Frankfurter Buchmesse ha Michael Gutsche gia exponì ses maletgs. L'onn 2019 ha el accumpagnà durant 2 mais in’excursiun scientifica en l’Arctica per fotografar las lavurs sin la bartga «Polarstern», cun la quala scienziadas e scienziads han perscrutà ils effects da la midada dal clima. Per quella lavur ha Michael Gutsche retschavì premis internaziunals.
Da lura ano ha il fotograf survegnì lavur sin l'entir mund. Michael Gutsche di da sasez, ch’el saja in fotograf critic – el veglia che ses maletgs mussian la realitad. El s’occupa cun tematicas delicatas sco il conflict dal Dalai Lama encunter la China, cun la midada dal clima u per exempel era cun il consum da medias. «Da fotografar ina nozza n'interessass betg mai», ri il fotograf: «Forza sch'jau dastgess era mussar las situaziuns criticas da la nozza…ma quai na vul nagin vesair.»
Fidaivel a sasez
Il Deutscher Bundestag vuleva exponer l'onn passà – en connex cun ina sesida da cumpra – las fotografias da Michael Gutsche da la collecziun «Sin glatsch satigl/Auf dünnem Eis». Ina giada ad onn vegnan cumpradas ovras da muntada naziunala. Quai è in grond pass per mintga artist. Ils organisaturs vulevan mussar las fotografias en in format pli pitschen, ma quai na vuleva il fotograf betg. «Jau hai savì, che quai saja in criteri d’eliminaziun», lascha el valair. Or da motivs artistics n'haja el dentant betg vulì exponer ils maletgs en in format pli pitschen.
Jau na vul betg perder mia fatscha sco artist, e la qualitad dal product na dastga mai pitir.
Fotografias en formats gigantics èn pia in caracteristicum da sia lavur. Sin la dumonda, tge che saja il pli impurtant en sia lavur, rispunda el: «Jau na vul betg perder mia fatscha sco artist, e la qualitad dal product na dastga mai pitir.» Igl è pia questa lavur sincera che para d'esser l’essenza da la lavur fotografica da Michael Gutsche – maletgs che mussan mintga detagl, cun sguard critic-sincer ed en format grond – grond sco las muntognas or da la fanestra a Maton.