Gabriel Derungs fa frunt a Parkinson
Parkinson è ina malsogna che n'è betg curabla fin uss. I sa tracta d'in disturbi neurologic cronic. Quel fa che las cellas da la gnerva en il tscharvè – en spezial quellas che produceschan dopamin – moran plaun a plaun. Quai chaschuna sintoms sco tremblar u moviments plauns.
Gabriel Derungs (72) da Danis, ha survegnì sia diagnosa avant circa 6 onns. Cun sustegn da sia dunna haja el sentì ch'el stoppia acceptar quella diagnosa e far il meglier or da la situaziun. Betg laschar pender il chau è sia devisa.
A l'entschatta èsi stà ina frida. Jau na saveva betg tge far encunter u sch'ins po insumma far insatge encunter.
Era cun la malsogna vul el giudair la vita – chantar, star sin tribuna, guardar ballape, ir a spass u passentar temp cun la famiglia, quai gidia fitg. Il sport na saja dentant betg pli il medem...
Pli baud, cura ch'jau er anc trenader, na sun jau betg stà en in studio da fitness cun mes giugaders. Jau era pli gugent dadora cun els. Oz sun jau engraziaivel che jau poss ir en il fitness 2x l’emna.
«Il sport è la meglra medischina»
Gabriel Derungs va duas giadas a l’emna en il fitness e dasperas guardia el d’esser bler en moviment. Ir a spass u trenar ed activar la musculatura en il fitness saja gist uschè impurtant sco la medischina ch’el dovria. Senza medischina na giessi betg, ma era betg senza il sport.
Gabriel Derungs desista per exempel d'ir cun skis. I saja stà difficil da stuair chalar cun quest hobi. El haja fatg uschè gugent quai sport, di el. El na possia dentant betg ristgar d'avair in accident e crudar ora en il fitness. El dovria il trenament cunter la malsogna uschia sco il respirar.
-
Bild 1 von 2. Bildquelle: RTR.
-
Bild 2 von 2. Gabriel Derungs scriva si tut. Ina memoria co che tut ha cumenzà, la diagnosa, il schoc e tgi che sustegna el sin sia via. El scriva era diari co ch'i va cun la malsogna. Bildquelle: RTR.
L'ambient renda! Sia famiglia sustegnia el fitg. Er en il studio da fitness ha el amis, buns amis dal temp da ballape. I va pli tgunsch sch'ins n'è betg persul en il trenament, di Gabriel Derungs. Mintga mardi s'inscuntra el cun ses amis. Sper il trenament vegn discurrì bler dal ballape e dal passà.
Gabriel Derungs, Benedetg Albin e Paulin Candinas en il fitness
-
Bild 1 von 6. Bildquelle: RTR.
-
Bild 2 von 6. Bildquelle: RTR.
-
Bild 3 von 6. Bildquelle: RTR.
-
Bild 4 von 6. Bildquelle: RTR.
-
Bild 5 von 6. Bildquelle: RTR.
-
Bild 6 von 6. Bildquelle: RTR.
Quant impurtant è il moviment en la vegliadetgna?
Gia a partir da la pensiun sa reduceschia il senn da l'equiliber rasantamain. Senza trenar na daventia quel era betg pli meglier. Il privel da crudar è pia grond, perquai ch'era la reacziun sa reduceschia cun la vegliadetgna, declara la cussegliadra da moviment, nutriment e relaxaziun, Rosita Valaulta.
Cun il moviment pon ins lavurar cunter malsognas che sa sviluppeschan savens en la vegliadetgna, sco per exempel il diabetes, l'osteoporosa, l'artrosa u malsognas dal cor.
Sch'ina persuna cupitgia, è quai in ulteriur grond pass enavos e la persuna na vegnia suenter forsa betg pli a frida senza tgira u assistenza externa.
Mes motto: Ins na po betg dar dapli onns a sia vita, ma ins po dar dapli vita a ses onns.