Il parlament da Cuira è per la pendiculara Brambrüesch e tuttina van las opiniuns dapart. Quai s'ha ha mussà tar la votaziun in mars, cura ch'intgins han sustegnì la colliaziun directa da Cuira a Brambrüesch per circa 40 milliuns francs. Auters eran cunter quest project ed han gia annunzià ch'els vegnian ad inoltrar in'incumbensa per renovar mo ina part da la pendiculara.
E quai han els fatg en la seduta dal parlament da Cuira da l'avrigl. L'incumbensa pretenda che la suprastanza da la citad examinescha ensemen cun la BCD (Bergbahnen Chur Dreibündenstein) diversas soluziuns per la segunda secziun. La pendiculara che maina dal Känzeli enfin Brambrüesch saja numnadamain a la fin da sia durada da vita e stoppia vegnir renovada.
Tenor Vincenzo Cangemi, parlamentari da la Partida socialdemocratica duess era vegnir examinà da cumprar ina pendiculara d'occasiun. La part sut è 20 onns e pudess anc funcziunar circa 30 onns. Sch'ins cumprass ina pendiculara d'occasiun cun circa la medema durada da vita pudess'ins suenter 30 onns discutar ina renovaziun da l'entir indriz.
L'incumbensa ch'è vegnida surdada na pretenda betg in project concret. Pervia da quai n'èn era las dimensiuns ed ils custs anc betg definids. Vincenzo Cangemi va da quai anora, che la cifra da 14 milliuns francs ch'è ina giada circulada na basta betg per renovar la segunda secziun. El fa quint cun circa 20 milliuns francs – tut tenor tge ch'ins fa tut.
I dependa tge ch'ins fa tut: èsi mo la segunda secziun u fan ins era la staziun accessibla a persunas cun in impediment? Quai èn chaussas che custan lura er in u dus milliuns francs.
Quatter da las sis fracziuns en il parlament da Cuira sustegnan l'incumbensa. Tar la Partida liberaldemocratica mo la mesadad. Ed il Center è l'unica partida che na sustegna betg questa via. Tenor la parlamentaria dal Center Leonie Liesch na saja in'incumbensa politica betg necessaria. Davostiers vegnian gia fatgas diversas mesiras da la BCD. Ella fiss stada per la colliaziun directa si Brambrüesch.
L'incumbensa è vegnida inoltrada e la citad ha dad examinar las soluziuns. Cun quai ch'il project concret da la colliaziun directa è dapi la votaziun il mars giud maisa datti diversas dumondas avertas. Per exempel fiss tar la colliaziun directa vegnida spustada la staziun da val e pervia da quai avess la halla da la citad stuì vegnir rutta giu. La nova incumbensa sa focusescha sin la part sura, la segunda part da la pendiculara. Pervia da quai ha la Partida socialdemocratica er anc inoltrà in'interpellaziun per la halla da citad.
Autras dumondas che la citad sto examinar èn:
- Tge capita cun la contribuziun d'investiziun ch'è vegnida concedida? È ina part schon vegnida duvrada? Po questa vegnir duvrada per il nov project u sto quai puspè vegnir approvà da la populaziun?
- Tge capita cun la contribuziun annuala che la citad da Cuira ha enfin qua pajà a la pendiculara? Vegnan quests 350'000 francs per onn bloccads u curran quests vinavant?
La balla è uss tar la suprastanza da la citad da Cuira. Il parlament è s'exprimì cun quest'incumbensa per ina nova segunda secziun da la pendiculara Brambrüesch. Questa saja a la fin da la durada da vita ed i vegnia adina pli grev da chattar tocs da reserva sche insatge è defect.