Protecziun da muntaneras - «Pasturs Voluntaris» – sustegn sin las alps

L'onn passà èn prest 700 persunas idas voluntariamain ad alp per sustegnair pasturs e pasturas tar la protecziun da la muntanera, quai tenor ina valitaziun da differentas organisaziuns che stattan davos il project. Il project saja in success, ha ditg Nina Rossi da «Pasturs Voluntaris» envers il schurnal regiunal da SRF.

Ils voluntaris e las voluntarias sajan fitg motivadas e derivian da l'entira Svizra e per part era da la Germania. Ina gronda part dals voluntaris vegnia er adina puspe – l’aventura constettia per els ed ellas, di Nina Rossi. Per l'ina saja l'aventura en la natira quai che attiria la glieud, mo quai na saja betg la suletta raschun. Ils voluntaris hajan gugent la lavur fisica e ch'els possian gidar a far saiv en terren taiss. Er il sustegn dals agriculturs e da pussibilitar ina coexistenza cun animals da rapina gronds sajan raschuns per far la lavur voluntaria.

Gist per quels che tegnan nursas saja il sforz daventà fitg grond ils ultims onns, di Nina Rossi. Era perquai ch'ins na possia betg pli laschar las nursas senza protecziun en las muntognas. Igl è da far plirs kilometers saiv. Sch'ins stoppia far quai sulet, lura saja quai fitg pretensius e dovria bler temp. Cun agid dals voluntaris saja questa lavur fatga bler pli sperta.

Protecziun da muntaneras en privel

Il project «Pasturs Voluntaris» contribueschia ina part ch'i dettia pli paucs stgarps sin las alps, di Nina Rossi. Bain haja ils ultims onns adina dà dapli lufs en Svizra, las cifras dals stgarp na sajan dentant betg pli creschidas. Quai haja per gronda part da far cun la protecziun da muntaneras. Cun in sguard en il futur fan ils iniziants dentant era quitads, tranter auter perquai che la Confederaziun veglia sa retrair per ina part da la protecziun da muntaneras. I saja impurtant che quella vegnia er en il futur finanziada dal maun public. L'agricultura dovria il sustegn per che purs e puras possian proteger lur nursas.