La stagiun da skis passada avess en sasez stuì esser in punct culminant per il territori da skis Minschuns en la Val Müstair. 50 onns avess el numnadamain cumplenì.
Però betg mo la festa da giubileum è crudada en l'aua, mabain pervi da pauca naiv er la stagiun da skis sco tala. In fatg che preoccupescha ils responsabels, sco quai ch'il mainagestiun Daniel Pitsch manegia en in'intervista envers la FMR.
Cun retard ha cumenzà la stagiun d'enviern, durant quella mancanza da naiv e paucs giasts, perquai stuì terminar la stagiun pli baud che planisà e lura pervi d'in problem tecnic vi d'in runal schizunt stuì terminar la stagiun per immediat e per anc in'emna pli baud. Quai è la versiun curta da la stagiun da l'enviern passada per il territori da skis Minschuns en la Val Müstair.
Daniel Pitsch ha 68 onns e maina il territori da skis Minschun en la Val Müstair.
Per questa stagiun na po el betg guardar enavos sin ina stagiun da skis uschè allegraivla en la Val Müstair.
Ina stagiun che fiss en sasez stada sut l'ensaina dal plaschair e dal far festa. Il territori da skis ha numnadamain cumplenì ses 50avel onn da gestiun. Pervi d'in mortori han ils responsabels dentant suspendì tut las festivitads da giubileum. In fatg che na fetschia dentant betg uschè gronds quitads sco auters per il mument, manegia il mainagestiun ed anteriur pur Daniel Pitsch, prendend bilantscha d'ina stagiun da skis tut auter che legraivla.
FMR: Daniel Pitsch, la stagiun da skis 2025/26 avess en sasez stuì esser ina stagiun da festa per Vus. Èsi stà exact il cuntrari?
Daniel Pitsch: Gea, quai è uschia. Ina stagiun per emblidar – e quai è gia la segunda en fila. Gia la stagiun da l’onn passà n'è numnadamain betg stada propi fitg allegraivla e quest onn èsi stà anc mender. La mancanza da naiv n'è dentant betg mo stada per nus sco territori da skis in fitg grond problem, mabain quai che s’ha mussà quest onn a moda fitg exemplarica, er per tut quellas e quels che fan tar nus turas da skis. Er qua han fitg blers giasts ditg giu lur turas e cun quai lur vacanzas tar nus en la Val Müstair.
Quant mal ha la serrada anticipada però fatg ad Els – probablamain be in pitschen dagut en il mar, sch'ins resguarda l'entira stagiun?
Daniel Pitsch: Il quint da gestiun final n'è anc betg fatg. Ma quai che nus pudain gia dir è che nus avain gì radund 60% damain entradas questa stagiun passada. Sche quai avess da cuntinuar vinavant uschia, lura daventa questa situaziun per nus ina gronda sfida. Betg mo quai che pertutga la vart finanziala, mabain era sco lieu da lavur. Sche nus avain numnadamain da serrar nossas portas duas emnas il schaner ed a moda nunspetgada e per dal bun il cumenzament da mars, lura n'essan nus in bel di er betg pli in patrun da lavur attractiv.
L’onn 2018 aveva la populaziun da la Val Müstair approvà ina revisiun parziala da la planisaziun locala per pussibilitar il ressort La Sassa a Tschierv.
Previs èsi da construir per radund 40 milliuns francs sis edifizis cun 200 letgs cun ina pendiculara d’access en il territori da skis ed in implant d’ennavar. Ils investiders da quest project èn il biro d’architectura Domenig a Cuira, la vischnanca da Val Müstair ed il territori da skis Minschuns.
Malgrà che la regenza grischuna aveva quella giada approvà il project, han diversas organisaziuns d'ambient fatg recurs cunter questa decisiun. Il 2025 ha la Dretgira superiura dal chantun Grischun lura refusà parzialmain il recurs cunter il ressort La Sassa e fatg via libra cun quai a sia realisaziun.
Gist perquai è il ressort La Sassa cun tut las installaziuns d'ennavar uschè impurtant per nus. Ina regiun da skis senza in’innovaziun, nua ch'ins na po betg garantir ina stagiun da mez december fin la fin da mars, quai na funcziuna ozendi simplamain betg pli.
Avant che nus discurrin davart il ressort La Sassa, co statti propi cun il runal defect?
Daniel Pitsch: Quai è in problem magari previsibel. Per il mument essan nus vid sclerir cun l'assicuranza tgi ch'è la culpa e tgi che sto lura surpigliar ils custs da reparatura. La tecnica vi da quest runal d’era numnadamain magari nova e revedida. Il toc defect –
ina rudella da deviaziun (Umlenkrolle) – è dentant gia qua e per la fin da quest mais èsi previs da la montar.
Però, tut na gida nagut, sch'il ressort La Sassa na po betg vegnir realisà?
Daniel Pitsch: Quest project è sco ditg fitg essenzial, e quai per tut la Val Müstair. Nus avain uss bundant set onns retard, quai pervi da differents recurs e corona. Quest temp avain nus dentant pudì nizzegiar per surlavurar anc ina giada il project ed essan uss pronts per inoltrar la dumonda da concessiun fin mez zercladur da quest onn. E sche la concessiun vegn approvada – e sch'i na dat nagins ulteriurs recurs – sche lura pudessan nus teoreticamain cumenzar a bajegiar la stad 2027. Quai che vuless dir che la pendiculara e l'ennavaziun fissan prontas per la stagiun d'enviern 2027/28 ed il ressort da vacanzas lura circa in onn pli tard. Ed er anc in punct fitg allegraivel, pervi da la reelavuraziun dal project ans èsi reussì da segirar ils custs, sper la chareschia, uschia sco projectà oriundamain.
Dentant, il ressort La Sassa pudess tuttina vegnir memia tard. Plaunet giaja ad Els sco interpresa numnadamain vi dal viv?
Daniel Pitsch: Igl èn gia tschertas persunas che fan fitg gronds quitads en vista a l'avegnir. Per il mument vai anc. Ma sch'i avess dad ir vinavant uschia, senza ch'il ressort La Sassa vegnia realisà, sche n'essan nus en dus u trais onns betg pli qua. Quai che fiss ord vista turistica in problem pli grond per l'entira Val Müstair. Senza pendicularas stuessan numnadamain er blers hotels serrar lur portas. Perquai sper jau per tuts qua en val che nus possian realisar quest project.
Ed uschia prender suenter las festivitads?
Daniel Pitsch: Che las festivitads èn crudadas en l'aua è natiralmain fitg putgà. Però bel vi da las festivitads da 50 onns fiss stà oramai, sche nus avessan il medem mument er pudì festivar per la realisaziun dal project. Lura fiss quai stà insatge auter. Per il mument motiv da far festa fiss propi be lura, sche nus survegnin la concessiun e pudain cumenzar a bajegiar. Nus essan dentant sin buna via, era quai che pertutga pussaivels recurs. Nus avain surlavurà il project uschia che jau na poss simplamain betg m’imaginar ch'in recurs avess d’avair ina schanza. Perquai sun jau da fitg buna speranza da cuntanscher mia finamira persunala: Numnadamain da pudair sco mainagestiun anc bajegiar il ressort La Sassa e lura suenter 30 onns pudair surdar mes post finalmain en mauns pli giuvens.