Las lingias d’aua sut l'Obere Gasse èn 110 onns veglias e ston vegnir sanadas, di il suprastant da la citad da Cuira, Simon Gredig. E cunquai che la via vegn uschè u uschia stgarpada si, duain era gist vegnir sanadas las lingias da gas, d’electricitad ed era vegnir installada ina rait da chalur a distanza.
Sch'i na vegn fatg nagut ed i dat baud u tard dapli stgarps da bischens, alura avain anc in pli grond problem.
En las giassas da Cuira n'èsi betg simpel da bajegiar. Simon Gredig sa perquai, ch'i na vegn betg a dar ina procedura da fabrica perfetga. Tuttina veglia la citad far il meglier pussaivel ed è uschia sa scuntrada cun ils possessurs da chasa e da fatschentas sco era cun las abitantas enturn l'Arcas. Là duai numnadamain vegnir installada la plazza da deponia, nua ch’il stgavament vegn manà nà e nua che bischens e material da fabrica vegnan deponids.
Tge questa deponia duai exnum vegnir installada sin l'Arcas na chapescha la gruppa da possessurs ed abitantas betg. Bunamain 30 persunas da la gruppa e la citad èn vegnidas ensemen per discutar anc ina giada quest punct. L'Arcas saja ina plazza turistica nua che persunas passan, sesan en cafés e restaurants e nua che persunas lavuran ed abitan.
Quai va dus onns – e betg mo dus u trais mais. Jau na crai betg che tut las fatschentas vegnan a surviver quai.
Linus Caduff posseda il Café Arcas e tema ch'i dettia blera canera e pulvra cun tut las maschinas da fabrica che passan. D'ina vart da ses café saja numnadamain il plazzal da fabrica sin la Obere Gasse – e da l’autra vart la deponia sin l'Arcas.
Abitar durant dus onns sper in plazzal
Monika Hitz è possessura da la Textilwerkstatt ed ella dat a fit diversas abitaziuns en la chasa directamain dasper la deponia. Quai saja in conflict da stuair dir a ses fittadins ch'i vegn a dar per dus onns in plazzal da fabrica en directa vischinanza, senza reducziun dal fit. Tar ses atelier na vai betg per sia existenza, ella saja pensiunada. Durant quests dus onns vegnia ella però a pudair porscher in toc pli paucs curs. Gist davant sia porta e fanestras da chasa dettia ina paraid che protegia da la deponia. Ella arrivia pia mo tras in stretg corridor en sia chasa.
Simon Gredig ha chapientscha per tut quest quitads. Er el chatta la soluziun da metter la deponia sin l'Arcas insumma betg optimala – tuttina saja quai la meglra da tut las passa 10 soluziuns che la citad haja examinà. Tar l'Arcas sajan las vias per las maschinas da fabrica las pli curtas – quai è impurtant per la segirezza ed era per las emissiuns.
Pli lunsch davent che questa deponia è, dapli viadis ston ins far. Empè d’in viadi stuess il chavaterra ir 10 giadas vi e nà.
In cumpromiss che resulta dal discurs è, che la citad na lascha betg la deponia per tut ils dus onns sin l'Arcas. Mabain midia quest lieu – sche pussaivel – cura che las lavurs da fabrica sa spostan en direcziun Gansplatz.
Betg tuts èn d’accord: la gruppa da possessuras ed abitants giavischass anc adina che la deponia na vegn insumma betg installada sin l'Arcas. Ma sche la citad vesa questa soluziun sco la meglra, alura vegn la deponia fatga là. Las lavurs entschaivan la fin mars e duran dus onns.