Cun gist dus implants solars planisads è Sedrun sin buna via da daventar in mecca per l'energia solara. En in'emna po in'emprima part da l'implant Sedrun Solar cumenzar a furnir energia solara en la rait electrica. Cunquai è Sedrun Solar la segunda interpresa en Svizra – suenter Madrisa Solar – che po metter en funcziun ses implant solar autalpin en il rom da l'iniziativa «Solarexpress».
Surpassà tut las spetgas
Actualmain èn gia bunamain 900, dals radund 5'700 moduls solars, installads – pia circa 16% da l'entir implant solar. Sedrun Solar surpassa cunquai tut las spetgas e po quest onn gia furnir dapli energia en la rait che planisà. La Confederaziun aveva mess la pretensiun da cuntanscher almain 10% alimentaziun da la rait electrica enfin la fin da l'onn 2025.
Ciril Deplazes, il manader da l'interpresa Sedrun Solar SA, sa mussa fitg cuntent cun quest progress speditiv. Fertant che la prestaziun da Sedrun Solar ha surpassà las spetgas, sajan ils custs restads en la dimensiun prevesida. Il pass vid la rait saja in mument fitg impurtant per la firma, che tutga a la vischnanca da Tujetsch.
Lavur da precisiun cun agid tecnic
Schegea che las lavurs vi da Sedrun Solar han fatg in meglier progress che spetgà, ha la construcziun era purtà pliras sfidas per ils inschigners. I saja ina lavur da centimeters, mintga modul sto vegnir plazzà cun gronda precisiun per pudair garantir ina effizienza maximala, declera Ciril Deplazes.
-
Bild 1 von 7. La «Muntaniala» ha ina rolla impurtanta en il process da construir Sedrun Solar. Bildquelle: RTR.
-
Bild 2 von 7. La «Muntaniala» po furar las runas per il fundament da Sedrun Solar era sin las pauncas las pli taissas. Bildquelle: RTR.
-
Bild 3 von 7. Tut ils elements ston esser plazzads a moda fitg precisa per maximar l'effizienza da l'implant solar. Bildquelle: RTR.
-
Bild 4 von 7. Cun il helicopter vegnan ils singuls elements transportas sin la plaunca, nua ch'els vegnan montads. Bildquelle: RTR.
-
Bild 5 von 7. Ina lavur che pretenda la concentraziun cumplaina da tuts involvads. Bildquelle: RTR.
-
Bild 6 von 7. Grazia a la «Muntaniala» survegnan ils constructurs era datas, ch'èn relevantas per la construcziun da l'implant solar. Bildquelle: RTR.
-
Bild 7 von 7. La construcziun fitg precisa ha purtà pliras sfidas per ils inschigners. Bildquelle: RTR.
Per garantir questa precisiun hajan ils constructurs gì l'agid da la maschina «Muntaniala», ch'els han inventà sez spezialmain per quest project solar. Ella fora mintgamai las rusnas per il fundament da l'implant solar sin la plaunca taissa.
Grazia a las experientschas da furar rusnas che nus avain rimnà ils ultims 30 onns, èsi stà pussibel d'inventar la maschina «Muntaniala».
Senza l'agid da la «Muntaniala» na fissi mai pussibel da furar las passa 20'000 rusnas ch'èn necessarias per l'implant solar aifer quatter onns, declera Marcus Pally da la Sedrun Solar SA. Il medem mument trametta la «Muntaniala» era diversas datas directamain als constructurs responsabels.
Perspectivas per l'avegnir
Cun sias innovaziuns pudess Sedrun Solar surpigliar ina rolla da pionier per sumegliants projects en regiuns autalpinas. L'ovra solara a Sedrun n'ha betg mo cumenzà sco emprim cun la construcziun, mabain po uss era furnir energia solara sco ina da las emprimas ovras autalpinas en Svizra – l'interess vi da Sedrun Solar è pia grond.
Tuts che vulan era construir in tal indriz vegnan probabel e guardar il noss. Uschia èsi pussibel da prender cun sai uschè bler che la construcziun vegn relativamain simpla en l'avegnir
Il team da construcziun da Sedrun Solar è optimistic che l'implant solar po far frunt a las cundiziuns diras da l'enviern. L'implant da test saja numnadamain gia sa cumprovà. Fin l'onn 2028 sperian ins lura d'avair cumplettà l'entir implant solar.
Or da l'archiv:
Fertant che Sedrun dat gas cun dus projects solars da pionier, stagnescha il «Solarexpress» anc en auters lieus dal Grischun – la gronda part dals projects planisads spetga anc sin la lubientscha da construir.