Siglir tar il cuntegn

Header

audio
Discurs cun il president da Trun cultura Armin Niederberger
Or da Actualitad dals 07.12.2023. Maletg: RTR
laschar ir. Durada: 3 minutas 21 Secundas.
cuntegn

Casa Carigiet Suenter che la segirtad è garantida duai il palancà svanir

Il palancà da la Casa Carigiet a Trun è sballunà il suentermezdi. Sco il president communal da Trun, Dumeni Tomaschett, ha confermà ad RTR, n’èn persunas betg vegnidas blessadas. Il palancà è sballunà mesemna curt suenter las 13:00.

Per l'uniun Trun Cultura ina situaziun malempernaivla. L'uniun Trun Cultura è vegnida en possess da la chasa tras ina donaziun d'in cont da l'Italia. Ella ha planisà d'allontanar il palancà ed il tetg provisori sin la primavaira da l'onn proxim.

Las raschuns, daco ch'il palancà è sballunà, stoppian vegnir examinadas. Tut saja adina vegnì controllà per garantir la segirtad. L'interpresa ch'ha construì il palancà, haja controllà quel periodicamain. Er suenter las grondas navadas la fin d'emna passada haja el tenor Armin Niederberger liberà il palancà, ch'ha cuvert la chasa, da naiv.

Uss stoppian dentant las lavurs per segirar l'intern cumenzar, di il president da l'uniun Trun cultura Armin Niederberger. Atgnamain duess tut esser segir, dentant vegnian anc glieud da las assicuranzas e da la construcziun da palancads ad examinar il lieu. La finamira saja anc adina d'esser pront, almain cun ina part dal bajetg, per las festivitads da 600 onns Lia Grischa il proxim onn.

Suenter ch'il palancà e sballunà, ha la vischnanca cunzunt vulì segirar il conturn. Il president communal ha ditg ch'il sulet che la vischnanca possia far saja da segirar il lieu. Fin Nadal duai il palancà vegnir dustads.

La Casa Carigiet aveva brischà il favrer 2019, las duas auzadas sisum èn vegnidas donnegiadas.

RTR novitads 12:00

Artitgels legids il pli savens