Ils onns 70 fabritgavan radund 400 persunas a Trun vestgadira sin mesira. L'onn 2001 ha la fabrica da ponn da Trun lura stuì serrar sias portas per adina. Pli tard èn ina pizzaria, e silsuenter duas differentas bars, sa chasadas lien. Ussa duai il local vegnir affittà per occurrenzas.
Suenter che la localitad è stada vida durant radund in onn, ha la possessura – la Distec SA da Mustér – gì l'idea da dar a fit quest'anteriura fabrica per nozzas, natalizis u occurrenzas da fatschenta.
La sala mobigliada cun cuschina ha gia servì in temp sco ustaria e bar. Dapi corona saja dentant vegnì anc pli grev da manar ina manaschi gastronomic, manegia la responsabla Daniela Manetsch.
-
Bild 1 von 4. Uschia vesa la sala cun bar ora sch'ella na vegn betg utilisada. Bildquelle: Distec SA.
-
Bild 2 von 4. Daniela Manetsch (dretg) e la co-responsabla Nadja Racheter en la Fabrica16. Bildquelle: RTR.
-
Bild 3 von 4. Cun il mobigliar porscha la sala spazi per enfin 55 persunas. Bildquelle: Distec SA.
-
Bild 4 von 4. I dat er ina cuschina en la localitad. Bildquelle: Distec SA.
Suenter che las responsablas, Daniela Manetsch e Nadja Racheter, han tschertgà ditg in locatari u ina locataria permanenta senza success , hajan ellas gì l'idea da dar a fit la Fabrica16 – sco quai ch'ella vegn numnada da nov.
Nossa visiun è da purtar anc dapli vita en quest areal istoric, e da porscher ina plivalur a la regiun.
En Surselva n'èsi betg uschè simpel da chattar talas localitads per fittar. Dependenta na saja la Distec SA betg dals tschains da locaziun. Dapi il 2001 è ella proprietaria da la veglia fabrica da ponn – e tgi sa, forsa ch'insatgi ha tuttina il curaschi da surpigliar permanentamain la localitad che porscha plaz per 55 persunas. Quai fiss senz'auter pussibel, manegia Daniela Manetsch.