Spazi pajabel per indigens è rar a Flem. La quota dad abitaziuns secundaras è tar 70%, il dumber dad abitaziuns libras è sut 1%. Per cumbatter quest svilup ha la vischnanca da Flem cumprà la parcella «Burkhardt» per passa quatter milliuns francs. Sin la surfatscha da 3'018 meters quadrats duai vegnir creà spazi d'abitar pajabel. Las abitaziuns duain vegnir dadas a tschains per 20 francs per meter quadrat il mais.
Tschintg partidas sa participeschan a la concurrenza d'investurs. Ina da las participantas è la cooperativa per spazi d'abitar Sardona che vegn actualmain fundada.
Da Flem – a Flem – per Flem
Els na sajan nagin investur che possia ponderar in'idea sulet e dascus insanua en in biro, di Sebastian Boss, in dals iniziants da la cooperativa. Lur idea saja ina cooperativa, e quella stoppia vegnir purtada da la populaziun. Perquai saja l'emprim pass ch'ins preschentia e derasia quell'idea. La saira d'infurmaziun per la populaziun a Flem saja stada l'emprim pass per quai.
En il focus quella saira: l’idea ed ils avantatgs d'ina cooperativa dad abitar. En ina cooperativa na dettia nagin intent da rendita, ed i na dettia betg ina singula persuna che fetschia il grond profit – tut tutgia a tuts che sajan commembers da la cooperativa. La suletta finamira saja da metter a disposiziun il spazi d'abitar sin basa dal tschains da locaziun che sa basa sin ils custs.
Tschertgar societarias e societaris cooperativs
La finamira è clera: persvader uschè bleras persunas sco pussaivel dal project, per che quellas confermian lur intent da cumprar certificats da participaziun da la cooperativa. Ussa giaja vid la finalisaziun dals statuts da la cooperativa, per ch'els possian er fundar quella. Il matg sto la finanziaziun vegnir segirada e mez zercladur sto la gruppa inoltrar ses project a la vischnanca da Flem.
Tenor precaut – però plitost positiv
Ils da Flem paran dad esser interessads: var 140 persunas han chattà la via en la halla d'eveniments per la saira d'infurmaziun. Suenter l’occurrenza èn participants e participantas s'exprimids positiv davart la cooperativa. Inqualin pudess er s'imaginar da sa participar en ina u l'autra furma a la cooperativa. La cumissiun da concurrenza da la vischnanca da Flem decida l'avust, tgenin dals tschintg projects ch'ha persvadì il pli fitg e fa la cursa.