Contribuì a quella vieuta haja la prognosa positiva da la Confederaziun e dal chantun cun in augment da la populaziun il 2025. La planisaziun locala vegn ussa surlavurada ed i dat ina segunda exposiziun publica da la revisiun.
Quai èn davaira bunas novas per nossa vischnanca.
«Las prognosas da la Confederaziun e dal chantun predin in pulit augment da la populaziun en vischnanca», di Andreas Pfister, il manader da planisaziun e construcziun dad Ilanz/Glion. Quai munta ch’i na vegnia a dar quasi naginas exzonadas da surfatschas da construcziun.
L’istorgia
Il favrer 2020 ha la populaziun dad Ilanz/Glion approvà l'emprima fasa da la revisiun dal plan da zonas. In onn e mez pli tard ha la regenza grischuna approvà quella planisaziun. Sco quai che Andreas Pfister di, saja ì là surtut per armonisar las zonas da bajegiar e per unifitgar la lescha da bajegiar.
En il decurs da l'onn 2021 è il maletg directiv dal spazi vegnì elavurà e silsuenter è la vischnanca sa messa vidlonder da reveder la planisaziun locala, quai vul dir da dimensiunar las surfatschas da construcziun tenor il dumber d'abitantas e d'abitants e d’adattar la planisaziun al maletg directiv dal spazi.
Zonas memia grondas
L'emprim temp da la planisaziun locala sajan ins partids dal fatg che las zonas da bajegiar sajan bler memia grondas e stoppian vegnir redimensiunadas considerablamain, di il manader da planisaziun e construcziun dad Ilanz/Glion. «Da lezzas uras supponiv'ins che radund 150 parcellas stoppian vegnir exzonadas. Quai è lura era stà il cuntegn da l’emprima exposiziun publica da cooperaziun ch'ha gì lieu la fin dal 2024.»
En consequenza da quella publicaziun haja dà numerusas reacziuns da possessurs da terren che n'erian betg stads cuntents cun las exzonaziuns.
Pertge questa vieuta?
Sco quai ch’il vicepresident da vischnanca, Martin Capeder, di envers la FMR haja la vischnanca en il decurs dal 2025 survegnì da la Confederaziun e dal chantun ina nova prognosa davart il svilup da la populaziun. «Quella è crudada ora bler pli positiva che spetgà.» Uschia saja la pressiun da stuair reducir las zonas da bajegiar stada bler pli moderada.
Per infurmar pli en detagl nossa populaziun èsi previs da far ina saira d'infurmaziun.
L'uffizi da bajegiar dad Ilanz/Glion conferma che la gronda part dal terren da construcziun restia, tenor il stan actual da la planisaziun locala, vinavant en la zona ba bajegiar.
Nova procedura necessaria
Il vicepresident, Martin Capeder, di che la suprastanza communala haja prendì enconuschientscha da las novitads positivas e laschà surlavurar da nov la planisaziun locala. Damai che quella vegnia midada uschè marcantamain, èsi necessari da far ina segunda procedura da cooperaziun. Tenor Andreas Pfister da l'uffizi da construcziun vegn quella ad avair lieu davent da la fin da mars enfin la fin d’avrigl 2026. La zona da planisaziun saja vegnida prolungada fin l'onn 2028. (Guarda boxa).
«Per infurmar pli detagliadamain nossa populaziun èsi previs da far ina saira d'infurmaziun per tut tgi ch'ha interess.» Quella saira vegn ad avair lieu la fin da mars en l’aula da la scola a Glion.