L'Arena Alva e las vischnancas da Flem, Laax e Falera èn sa cunvegnidas davart il pretsch da cumpra per l'infrastructura da las pendicularas. Las trais vischnancas duain surpigliar l'infrastructura sin il culm per 94,5 milliuns francs.
Las trais vischnancas duain sa participar cun en tut 50 milliuns francs, ils 42,5 milliuns francs vegnan ord chapital ester da la Finanz Infra SA. A questa societad tutgan uss gia ils indrizs da far naiv en il territori da skis.
La gestiun duai restar tar l'interpresa, cun in contract da fittanza a lunga vista. Cun quest pass vulan las vischnancas evitar che las pendicularas vegnan vendidas ad investurs da l'exteriur.
| deposit da chapital vischnanca Laax | 20 milliuns francs |
| deposit da chapital vischnanca Falera | 10 milliuns francs |
| deposit da chapital vischnanca Flem | 2 milliuns francs* |
| emprest Arena Alva SA | 20 milliuns francs |
| chapital ester da la Finanz Infra SA | 42.5 milliuns francs |
| total | 94,5 milliuns francs |
*La vischnanca da Flem ha gia pajà anticipadamain 18 milliuns francs (FlemXpress) e sto perquai sa participar cun pli pauc che las autras vischnancas.
Votaziuns
Las votaziuns davart la cumpra da l’infrastructura da las pendicularas han lieu en tuttas trais vischnancas la fin d'october:
- Falera: 206 Gea cunter 5 Na e 10 abstenziuns a la radunanza communala da gievgia, ils 23 d'october
- Laax: venderdi, ils 24 d'october (radunanza communala)
- Flem: dumengia, ils 26 d'october (votaziun a l'urna)
La vendita dat da discutar er a Glion
En il rom da la sesida dal parlament da Glion ha il president communal Marcus Beer infurmà che la suprastanza haja discutà davart la vendita da l’infrastructura da l’Arena Alva. Las fracziuns Ruschein, Ladir, Siat, Rueun e Schnaus da la vischnanca fusiunada Ilanz/Glion hajan concedì concessiuns – pia dretg da bajegiar a l’Arena Alva. Davart da la vischnanca Ilanz/Glion sajan ins surstà ch’ins na saja betg vegnì contactà sco proprietari da funs nua che infrastructura turistica saja vegnida bajegiada.
La suprastanza communala da la vischnanca da Glion saja uss s’annunziada a scrit tar l’Arena Alva e tar las trais vischnancas Flem, Laax e Falera per far attent ch’els avessan er tscherts dretgs vi da l’infrastructura. La finamira saja che la populaziun da las fracziuns pertutgadas possia er en futur profitar da pretschs pli favuraivels sco fin uss.
Betg sa laschar dischavantagiar
Er la vischnanca burgaisa da Sagogn ha dà il dretg da bajegiar a l'Arena Alva sin terren ch’è en lur possess. La vischnanca burgaisa da Sagogn è mademamain s’annunziada a scrit tar las trais vischnancas e tar l’Arena Alva. Quai ha il president da la vischnanca burgaisa Sagogn, Flurin Panier, confermà sin dumonda da RTR.
La dumonda dals «benefits» per questas vischnancas è er stà tema tar la conferenza da medias dals responsabels la fin settember. Là aveva Reto Gurtner – il schef da l’Arena Alva – ditg ch’i saja da seser ensemen cun questas vischnancas e guardar tge ch’ellas sajan prontas da far per survegnir quel niz. Fin uss na para quai betg dad esser capità.