Suenter il cler Gea da Falera e Laax, ha era Flem – ch'ha gì il davos pled en chaussa – mussà cler sustegn per il deal cun l'Arena Alva a l'urna cun passa 85,5% da las vuschs a favur da la cumpra. Igl interess è stà grond: 67.7% dals votants e las votantas da Flem hajan fatg part a la decisiun, ha la vischnanca communitgà. Uschia è la cumpra da l'infrastructura da las pendicularas da l'Arena Alva definitivamain sut tetg.
Tut las trais vischnancas sa participeschan pia e cumpran l'infrastructura per 94,5 milliuns francs – passa 42 milliuns da quels vegnan però da chapital ester da la Finanz Infra SA, la societad che posseda gia oz ils indrizs da far naiv en il terrotori da skis e che tutga medemamain a las vischnancas. Cun la cumpra vulan las vischnancas impedir, che las pendicuaras giajan en mauns d’investurs da l’exteriur.
Era Laax dat glisch verda
Era la vischnanca da Laax ha la finala ditg Gea a moda surprendenta, malgrà ch'igl ha dà a Laax ina u l'autra vusch critica dapli che a Falera. Uschia hai dà tant la dumonda da spustar la votaziun sco era la dumonda da votar en scrit. Omaduas dumondas ha la radunanza communala renvià.
Ina parola critica a la radunanza a Laax: Il president communal Franz Gschwend avessia stuì prender stgisa ed il contract d'affitaziun tranter l'Arena Alva e la Finanz Infra sco possessura futura avessia stuì esser publics.
Falera cun Gea suprendent
Sco emprima da las trais vischnancas ha Falera gì da decider, sche l'Arena Alva duai vegnir cumprada u betg. Pervi dal grond interess da la populaziun da Falera aveva la radunanza communala cumenzà cun in zic retard.
Il resultat è stà in fitg cler: da 221 votantas e votants han be 5 ditg Na, fertant che 10 èn s'abstegnids – cunquai han ils da Falera mussà cleramain, ch'els vulan tegnair l'infrastructura da l'Arena Alva en possess da la regiun.
Cun questa cumpra scrivin istorgia!
-
Bild 1 von 2. Sala plaina a la radunanza communala a Falera – cun 221 votantas e votants – uschè blers sco anc mai. Bildquelle: RTR.
-
Bild 2 von 2. Ed er la Sala Grava a Laax era pli che plaina il venderdi saira. Bildquelle: rtr.
Dals total 94,5 milliuns francs per la cumpra da l'Arena Alva èsi previs che Falera sa participescha cun 10 milliuns francs. Zun cuntent cun il resultat è sa mussà il president communal da Falera, Norbert Good. «Cun questa cumpra scrivin istorgia», ha el ditg suenter che l'emprim pass per il deal è reussì.
In deal per evitar investurs exteriurs
L'Arena Alva e las vischnancas da Flem, Laax e Falera èn sa cunvegnidas davart il pretsch da cumpra per l'infrastructura da las pendicularas. Las trais vischnancas duain surpigliar l'infrastructura sin il culm per 94,5 milliuns francs.
Las trais vischnancas duain sa participar cun en tut 50 milliuns francs, ils 42,5 milliuns francs vegnan ord chapital ester da la Finanz Infra SA. A questa societad tutgan uss gia ils indrizs da far naiv en il territori da skis.
La gestiun duai restar tar l'interpresa, cun in contract da fittanza a lunga vista. Cun quest pass vulan las vischnancas evitar che las pendicularas vegnan vendidas ad investurs da l'exteriur.
| deposit da chapital vischnanca Laax | 20 milliuns francs |
| deposit da chapital vischnanca Falera | 10 milliuns francs |
| deposit da chapital vischnanca Flem | 2 milliuns francs* |
| emprest Arena Alva SA | 20 milliuns francs |
| chapital ester da la Finanz Infra SA | 42.5 milliuns francs |
| total | 94,5 milliuns francs |
*La vischnanca da Flem ha gia pajà anticipadamain 18 milliuns francs (FlemXpress) e sto perquai sa participar cun pli pauc che las autras vischnancas.
Votaziuns
Las votaziuns davart la cumpra da l’infrastructura da las pendicularas han lieu en tuttas trais vischnancas la fin d'october:
- Falera: 206 Gea cunter 5 Na e 10 abstenziuns a la radunanza communala da gievgia, ils 23 d'october
- Laax: 359 Gea cunter 14 Na e 12 abstenziuns a la radunanza communala da venderdi, ils 24 d'october
- Flem: 1'107 Gea cunter 188 Na a la votaziun a l'urna da la dumengia, ils 26 d'october
La vendita dat da discutar er a Glion
En il rom da la sesida dal parlament da Glion ha il president communal Marcus Beer infurmà che la suprastanza haja discutà davart la vendita da l’infrastructura da l’Arena Alva. Las fracziuns Ruschein, Ladir, Siat, Rueun e Schnaus da la vischnanca fusiunada Ilanz/Glion hajan concedì concessiuns – pia dretg da bajegiar – a l’Arena Alva. Da vart da la vischnanca Ilanz/Glion sajan ins surstà ch’ins na saja betg vegnì contactà sco proprietari da funs nua che l'nfrastructura turistica saja vegnida bajegiada.
La suprastanza communala da la vischnanca da Glion saja ussa s’annunziada a scrit tar l’Arena Alva e tar las trais vischnancas Flem, Laax e Falera per far attent ch’els avessan era tscherts dretgs vi da l’infrastructura. La finamira saja che la populaziun da las fracziuns pertutgadas possia er en futur profitar da pretschs pli favuraivels sco fin uss.
Betg sa laschar dischavantagiar
Era la vischnanca burgaisa da Sagogn ha dà il dretg da bajegiar a l'Arena Alva sin terren ch’è en lur possess. La vischnanca burgaisa da Sagogn è mademamain s’annunziada a scrit tar las trais vischnancas e tar l’Arena Alva. Quai ha il president da la vischnanca burgaisa Sagogn, Flurin Panier, confermà sin dumonda da RTR.
La dumonda dals «benefits» per questas vischnancas è era stada tema a la conferenza da medias dals responsabels la fin settember. Là aveva Reto Gurtner – il schef da l’Arena Alva – ditg, ch’i saja da seser ensemen cun questas vischnancas e guardar tge ch’ellas sajan prontas da far per survegnir quel niz. Fin ussa na para quai betg d'esser capità.