La davosa ustaria a Schlans - Suenter 15 onns: Il «Chispàcius» di adia

I n'è betg il plaschair u il persunal che mancan, ma ils dus ustiers hajan simplamain sentì ch'els veglian avair dapli temp per sasez e la famiglia. Uschia decleran Anna Maria e Clemens Pfister, ch'èn dapi quest onn omadus pensiunads, sia decisiun da serrar il chapitel cun il «Chispàcius». 15 onns han els manà ensemen l'ustaria pitschna ch'els han laschà bajegiar en ses agen curtin e che porscha plaz per radund 25 fin 30 persunas.

Da maisas avant chasa a l'ustaria dal vitg

I na saja mai stà l'idea da manar ina gronda ustaria, di Anna Maria Pfister. Ils emprims 5 onns devi gnanc il local en il qual els servan oz. L'um da 73 e la dunna da 65 onns hajan laschà inspirà da las uschènumnadas «Buschenschenken» u «Jausenstationen» ch'els avevan vis durant las vacanzas en il Tirol dal sid. Uschia hajan els ils emprims onns simplamain mess si maisas e servì da baiver e plattas fraidas avant chasa – quai, suenter ch'els eran pliras giadas vegnids dumandads da passantas e viandants sch'i na dettia betg in'ustaria a Schlans.

Da quai temp lavurava Clemens anc a temp cumplain, uschia ch'el sa gidava da mezdi e la saira cura ch'el turnava a chasa. Suenter 5 onns da success hajan els lura laschar construir il curtin d'enviern ch'els han davent da quai mument duvrà sco ustaria. Ils dis da bell'aura pon ils giasts era seser sin terrassa.

Dapi che Clemens è vegnì pensiunà avant 8 onns saja el cunzunt stà responsabel per la cuschina, ma natiralmain dettia el era gugent ina baterlada cun ils osps:

La fin da l'october vai dentant a fin cun tratgas tradiziunalas, sco capuns e gnocs. Ed era las bavrondas creativas da Anna Maria na pon ins lura betg pli degustar a Schlans. Il pèrin veglia avair dapli temp per sasez, ma era per ils trais uffants creschids e beadis. Natiralmain sentian ins era – cunzunt ussa, suenter la stad – ch'ins n'ha betg pli la medema energia sco pli baud, di Clemens Pfister.

Anna Maria e Clemens Pfister sa legrian da pudair visitar dapli occurrenzas culturalas e cunzunt da pudair decider mintga di tge ch'els hajan gust da far. Ils davos 15 onns hajan els be patratgà vi da l'ustaria e quai sa midia ussa. In sentiment ambivalent restia, di Anna Maria Pfister, ma la decisiun da serrar il «Chispàcius» sin la fin dal mais saja la dretga.

Nagina ustria dal vitg pli

Uschia tutga Schlans il medem destin sco blers auters vitgs era – i na dat nagina ustaria pli. Anna Maria e Clemens Pfister avessan plaschair sch’insatgi avriss ina nova ustaria en lur vitg. Era per mantegnair il spiert da cuminanza.

Lur localitad sa midia davent da l'auter mais d'in lieu da sentupada per ils giasts en in lieu da cumpagnia per lur famiglia.