Il nov tunnel «Las Ruinas» da 490 meters tranter Mustér e Curaglia duai augmentar la segirtad per il traffic sur il Lucmagn vers il Tessin. La mesemna ils 6 da matg han cumenzà las lavurs da perfuraziun, sco il chantun ha communitgà.
-
Bild 1 von 4. Lavurers ed envidads durant la ceremonia da perfuraziun en «Las Ruinas». Bildquelle: RTR.
-
Bild 2 von 4. La cussegliera guvernativa Carmelia Maissen. Bildquelle: RTR.
-
Bild 3 von 4. L'inschigner chantunal Reto Knuchel. Bildquelle: RTR.
-
Bild 4 von 4. L'avat Vigeli Monn da la claustra da Mustér. Bildquelle: RTR.
Il mars avevan cumenzà las emprimas lavurs per il project «Las Ruinas». Quai cun preparar e segirar il tunnel existent, per che las lavurs vi dal nov tunnel sajan pussiblas. Motiv: il vegl tunnel è be paucs meters davent da là nua ch'il nov tunnel vegn construì.
-
Bild 1 von 2. Il nov tunnel vegn construì sper il existent. Bildquelle: RTR.
-
Bild 2 von 2. Il tunnel existent n'è betg en ina buna cundiziun. Bildquelle: RTR.
L'Uffizi da construcziun bassa aveva examinà sch'i fiss pussibel da sanar il tunnel existent. Ma da sanar il tunnel uschia ch'el correspundess a las perscripziuns da segirtad e fiss lad e cler avunda avess custà dapli che construir in nov tunnel.
Suenter che las mesiras da segirtad vi dal vegl tunnel èn fatgas, duai la construcziun dal nov tunnel lura cumenzar il matg. Quel duai lura era guntgir las duas galarias. Previs per l'emprima etappa èn 32 milliuns francs.
Sche camiuns na pon betg pli cruschar
La via actuala è vegnida construida ils onns 1956 fin 1964, quai en il rom da la construcziun da las ovras electricas. Il problem è ch'ella na correspunda betg pli a las pretensiuns da standard dad ina via principala. Camiuns na pon per gronda part per exempel betg cruschar in l'auter.
Atgnamain avessan las lavurs vi dal project «Las Ruinas» gia gì da cumenzar avant trais onns e gì dad esser a fin quest onn. Pervia da recurs cunter la surdada dal project è tut vegnì spustà.
Suenter l'emprima etappa che cuzza enfin il 2029 è previs ina segunda. Quella prevesa la sanaziun dal segund tunnel direcziun Curaglia e la punt tranter ils dus tunnels. Questa etappa è dentant anc betg vegnida scritta ora. Las lavurs cumplettas duain lura esser a fin l'onn 2036.