Suenter indesch onns e mez sur sasez en la gastronomia - da quels sis onns sco ustier da l’Ustaria da la Posta a Vrin - veglie el dapli peda per sasez e per sia vita privata, di Lucian Alig, l'ustier da la Posta a Vrin. «Jau stoi era conceder ch’jau hai il basegn da ma sviluppar professiunalmain. Jau hai survegnì ina offerta che va en quella direcziun e che dat a mi supplementarmain la chaschun da lavurar pli reglà.» Sche questa offerta na fiss betg sa dada, avessia el probablamain bandunà la gastronomia, di Lucian Alig.
Lungs dis da lavur
«Jau hai gÌ in fitg bel temp sco ustier a Vrin. Jau na stun mal per betg ina minuta da quel temp ch’jau hai passentà qua», conferma l'ustier. El ha scrit ina brev persunala a tut las abitantas ed abitants da Vrin ed infurmà ch’el chalia ils 31 d’october 2026. Lucian Alig di che la professiun d’ustier saja in fitg bella professiun. Sper tut il bel dettia però era auters muments. «Tgi che vul far d’ustiera u d’ustier sto lavurar gugent. Ma cun lavurar otg uras e mez per di na fan ins betg l'ustier. Mes dis da lavur duran tranter 13 e 15 uras u dapli.» I saja bain ina existenza, ma che quella pretendia ch’ins s’engaschia sez e betg cun ina massa persunal.
Clientella maschadada
En l’Ustaria da la Posta haja el gì ina clientella fitg maschadada da turistas e turists ed indigenas ed indigens da Vrin, da la Lumnezia e da la regiun insumma, di Lucian Alig. «Igl è adina stà mia filosofia da betg esser in’ustaria mo per il vitg. Jau n'hai dentant era betg vulì manar ina ustaria mo per il turissem. Mes giavisch è stà che tuttas e tuts hajan plaz tar mai.» En buna memoria haja el blers inscunters directs tranter indigens e turists en sia ustaria. «Ussa èsi dentant uschia che la populaziun indigena tschessa dad onn tar onn.» El haja adina gì ina bellezza relaziun cun ses seniors da Vrin. Malgrà tut haja el ussa tuttina stuì decider per ses agen avegnir.
Tut che deplorescha
Il president communal da Lumnezia Daniel Solèr deplorescha fitg ch’ina ulteriura ustaria lumneziana serra sias portas. «L’ustaria da la Posta aveva in fitg bun num grazia a ses ustier Lucian Alig.» Il president da vischnanca ha chapientscha per il giavisch da l'ustier da s’orientar da nov en la professiun. En la medema crenna dat era Kevin Brunold, il directur da Surselva Turissem. «Vrin attira blers giasts cun sia architectura attractiva. E Vrin è in impurtant punct da partenza ed arrivada per quellas e quels che van mintg’onn sur la Greina. Ins po mo deplorar che in uschè bun ustier e cuschinier sco Lucian Alig terminescha ses temp. Jau sper che l’ustaria vegnia era en l'avegnir manada vinavant.»