Fatg naufragi
Il suveran da Mustér aveva refusà l'avrigl 2024 cleramain, cun 613 cunter 292 vuschs, in credit da 1,85 milliuns francs per renovar la Via Cons.
La sanaziun da la Via Cons era stada en la critica perquai che la vischnanca vuleva era gist nizzegiar la chaschun per midar ils parcadis tranter la scola e la baselgia sin tschella vart da la via e crear in spazi da sentupada sin il santeri. Ils adversaris eran da l'avis che quai na saja betg raschunaivel ed ins possia renovar la via bler pli bunmartgà.
Nova varianta
Uss ha la suprastanza preschentà ina varianta che resguarda ils puncts ch'èn vegnids crititgads la davosa giada. La via duai vegnir sanada senza far midadas vi da structura e conturn. Far il necessari è quella giada la devisa.
Nus sanain il perimeter da la via e faschain naginas autras midadas. Uschia resguardain ils giavischs da la populaziun.
Cun quella varianta datti in respargn da custs da 400'000 francs.
La populaziun po decider en ina votaziun a l'urna ils 28 da settember sch'ella vul dar il credit da 1,4 milliuns francs per la sanaziun da la via. Tar in Gea cumenzassan las lavurs da construcziun la primavaira 2026 e fissan terminadas tenor plan en il decurs da l'onn 2027.
Or da l'archiv: