Ils da Mustér han ditg Gea al project per sanar la Via Cons che chaschuna custs da 1'463'000 francs. Sco la vischnanca communitgescha han 78% ditg Gea e 22% Na. Tenor la vischnanca saja la sanaziun necessaria perquai che la chanalisaziun d’aua maschadada saja en in schlet stadi. Cun ils onns saja la via sa disfurmada.
Quest bun resultat è natiralmain fitg legraivel per nus, sco er quel grond sustegn che nus avain survegnì en la segunda votaziun.
La Via Cons è l’access als quartiers Gonda, Dulezi e Cons. Plinavant vegn la via utilisada sco ruta alternativa per la Via Alpsu e Via Lucmagn. Tar il project tutga la sanaziun da la Via Cons cun ils parcadis ed il passape.
En quella segunda votaziun avain nus resguardà surtut ils giavischs da la populaziun – quai vul dir che nus n'avain betg fatg midadas vi da la structura da la via ed avain laschà il mir là nua ch'el è ussa.
Las lavurs da construcziun duain cumenzar il 2026 e vegnir terminà tenor plan en il decurs da l'onn 2027. L'avrigl 2024 aveva il suveran refusà cleramain in'emprima proposta pli chara che vuleva far pli grondas midadas vi dals parcadis ed il santeri.
Fatg naufragi
Il suveran da Mustér aveva refusà l'avrigl 2024 cleramain, cun 613 cunter 292 vuschs, in credit da 1,85 milliuns francs per renovar la Via Cons.
La sanaziun da la Via Cons era stada en la critica perquai che la vischnanca vuleva era gist nizzegiar la chaschun per midar ils parcadis tranter la scola e la baselgia sin tschella vart da la via e crear in spazi da sentupada sin il santeri. Ils adversaris eran da l'avis che quai na saja betg raschunaivel ed ins possia renovar la via bler pli bunmartgà.
Nova varianta
Suenter il Na ha la suprastanza preschentà ina varianta che resguarda ils puncts ch'èn vegnids crititgads la davosa giada. La via duai vegnir sanada senza far midadas vi da structura e conturn. Far il necessari è quella giada la devisa.
Cun quella varianta datti in respargn da custs da 400'000 francs.
Nus sanain il perimeter da la via e faschain naginas autras midadas. Uschia resguardain ils giavischs da la populaziun.
Or da l'archiv: