La suprastanza communala da Breil aveva proponì d'augmentar il pensum dal president communal da 60% sin 80% u sche necessari schizunt sin 100%. Il parlament ha dentant refusà unanimamain d'entrar en la discussiun. Roman Flepp, president communal, n'ha betg chapientscha per questa tenuta:
Sch'ins resguarda tut las lavurs e las sfidas che spetgan, lura è quest augment giustifitgà. Quai n'è betg ina proposta absurda. E ch'els n'entran gnanc en in dialog ma fa schon smirvegliar.
Gia cun la fusiun da las vischnancas saja stà previs d'augmentar da 60% sin 80%, agiunta Roman Flepp.
Dapli lavur che pensà
Roman Flepp è dapi il schaner da quest onn en uffizi. Che quest presidi dovra dapli resursas haja el pir percurschì ils ultims mais. Sia motivaziun saja adina stada da far il presidi parzialmain e da far sias incumbensas sur sasez dasperas.
Ils ultims mais hai jau realisà tge incumbensas e tge sfidas che spetgan la vischnanca. Ed jau vuless gugent investir tut l'energia ch'jau hai en l'interess da la populaziun e l'interess da la vischnanca.
Cumpareglià cun autras vischnancas en Surselva para quest augment dentant surproporziunal: il pensum dal presidi communal a Glion (radund 5'000 abitants) munta a 80%, quel a Trun (passa 1'000 abitants) var 60%. En la vischnanca da Breil vivan radund 1'500 persunas.
Il president communal da Breil è dentant da l'avis ch'ins stoppia cumparegliar cun vischnancas turisticas ch'han structuras e dinamicas sumegliantas sco per exempel Scuol (80%) u Savognin (70 – 100%).
Er refusà autras tractandas
Enstagl da discutar èsi pia stà quiet la saira dals 27 da matg en la halla da gimnastica ad Andiast. Il parlament ha numnadamain er refusà ulteriuras tractandas: la suprastanza communala vuleva crear ina plazza stabla en il turissem ed augmentar ina plazza en l'uffizi da construcziun.
Nus lavurain halt cun quai che nus avain.
Per la nova suprastanza communala enturn Roman Flepp che vul purtar nov schlantsch en la vischnanca da Breil è questa sesida stada ina terrada.
El di ch'i saja d'acceptar e da guardar enavant. Els hajan vulì porscher soluziuns e propostas guardond en l'avegnir. Il parlament ha decidì da betg entrar en questas tractandas. Quai saja era in votum ed ins stoppia uschia lavurar cun quai ch'ins ha.
Pertge ch'il parlament n'ha betg vulì entrar en las differentas tractandas n'è betg enconuschent. Ni durant la sesida sco tala ni suenter sin dumonda da RTR ha insatgi prendì posiziun en chaussa.