Il mars passà han Toni e Renata Goldmann communitgà ch'els serrian lur pasternaria ils 24 d'october 2026. 34 onns han els manà l'interpresa amez il vitg da Mustér. Ina successiun n'è betg sa purschida, ma uss duai tuttina dar ina tala, almain per ina part. Renata Goldmann, Rita Schuoler e Daniela Lutz ch’en tuttas engaschadas en la producziun, en la stizun u il café da Goldmann èn sa decididas da cuntinuar cun ina sumeglianta purschida sco fin uss en in auter lieu en il vitg. L'edifizi al lieu nua che la pasternaria sa chatta oz vegn spazzà Là vegn erigida ina surbajegiada cun indesch abitaziuns.
Amez il vitg da Mustér, en il lieu nua che l'edifizi da la Pasternaria Goldmann sa chatta oz, vegn construida ina nova surbajegiada cun il num Casa Aurum. L'edifizi vegl vegn spazzà.
Tut en tut vegnan erigidas indesch abitaziuns, da quellas quatter cun dretg da segunda abitaziun. La surbajegiada porscha abitaziuns cun ina grondezza da 2 1⁄2 fin 4 1⁄2 stanzas.
Quests dis è l'annunzia da bajegiar vegnida inoltrada a la vischnanca da Mustér. La finamira è da pudair cumenzar cun la construcziun da la chasa la primavaira 2027. En il decurs da l'onn 2028 duain las abitaziuns esser finidas e prontas per ils possessurs u locataris.
Butia e café
La nova butia en il plaunterren da La Centrala – la centrala da latg da pli baud – a la Via Lucmagn a Mustér vegn numnada «Scazi by Goldmann». Cun quest num vulan las trais dunnas cuntinuar almain en ina furma cun la pasternaria e conditoria Goldmann ch'è s'etablida sur trais generaziuns. La butia cumbinada cun in café vegn averta l'emna tranter Nadal e Bumaun 2026. Il local en il plaunterren da La Centrala ha dal reminent gia servì sco ustaria pli baud durant in temp.
Atgna patissaria
«Nus purschain products da paun, sandwichs e pastizaria. Il paun vegn furnì da la Pasternaria Gabriel da Breil, la pastizaria producin nus sezs. Daniela Lutz è da professiun pastiziera», di Renata Goldmann e declera: «Il motiv principal da noss engaschi è da porscher er en l'avegnir a nossa glieud la pussaivladad d'empustar ina turta d'anniversari u in dessert per ina festa. Sche nus na faschain betg quai, lura na fa nagin quai tranter Sedrun e Glion.» Ina part da la purschida da las trais dunnas èn er aperos e catering.
Paun da la regiun
Il manaschi duai esser avert mintgamai dal mardi fin la sonda. «Nossa purschida duai er esser ina contribuziun a la vita en il vitg. Cun la stizun ed il café vulain nus – sper tut quai ch’è gia en il vitg – ch’i marscha insatge.» Cun retrair il paun d'in pasterner da la regiun vul ins products da qua. «Nus avessan er l’alternativa da retrair quests products d’in furnitur grond e lura da metter quels qua en in furn per la producziun finala. Quai na vulain nus dentant betg, punctuescha Renata Goldmann.
L'ultima confisaria
Cura che la pasternaria Goldmann a Mustér serra si’ischa ils 24 d'october 2026 sa serra il circul dals manaschis da pasternaria e confisaria tradiziunals a Mustér. Il 1993 devi anc trais pasterners a Mustér. Sper Goldmann eran quai quellas da las famiglias Herger e Monn. Cun endrizzar ina confisaria e vendita da paun en La Centrala amez il vitg resta almain ina part da questa branscha mantegnida a Mustér.