Venderdi ha la suprastanza communala envidà a la surdada dal premi Desertina 2026. Il premi da promoziun ha l'uniun da dunnas Mustér retschavì ed il premi da renconuschientscha Simon Camartin. Il «retg federal» Armon Orlik ha retschavì in cristal ed ina onuraziun speziala.
«Nus ans essan inscuntrads oz qua per onurar ina persuna che ha cuntanschì da quai che blers siemian, dentant che mo paucs cuntanschan: Nus onurain ina persuna che ha battì a la festa federala da lutga a Mollis cun curaschi, forza, perseveranza e caracter a la testa da noss sport naziunal. Igl è noss burgais e retg da lutga Armon Orlik» – uschia ha il president communal da Mustér René Epp introducì sia onuraziun venderdi passà. En l'emprima retscha aveva l'onurà prendì plazza ensemen cun ses geniturs Helena e Paul Orlik.
16 lungas minutas
I dettia muments en la cronica d'in vitg, d'ina regiun e d'in chantun, gea schizunt d'in pajais, ch'ins n'emblidia betg. In tal di saja stada la dumengia dals 31 d'avust 2025. En l'arena a Mollis, davant la culissa da 60'000 aspectaturs ed aspectaturas ed en l'otgavla runda, ha il finalist Armon Orlik tschappà ses adversari Pirmin Reichmuth e tratg el plat en il resgim. 10 puncts ha el gudagnà per quella prestaziun. Lura, en la lutga finala, ha el dentant stuì spetgar – 16 lungas minutas. La pli davosa runda han dus collegas dad Armon Orlik, Samuel Giger e Werner Schlegel cuntanschì. Senza ch'ins haja mess en dies in l'auter èn quellas 16 minutas idas a fin. In pari – ed il retg nov che spetgava ha dastgà giubilar.
Armon Orlik è vegnì encurunà sco emprim retg da lutga da la Svizra Orientala suenter 18 onns. L'emprim retg che deriva dal Grischun. «E lura anc in burgais da Mustér», ha René Epp ditg en ses pled. El ha punctuà las fermezzas e ludà las qualitads dal retg dal resgim. «Malgrà gronds success è Armon Orlik adina restà in modest.» El saja in exempel per la giuventetgna, in che mussia che prestaziun e caracter tutgan ensemen. A la fin da sia onuraziun ha il president communal surdà al retg da lutga in cristal da la vischnanca da Mustér, quella duaja adina regurdar el a sias ragischs.
Adina fitg gugent a Mustér
L'onurà è ì al microfon ed ha prendì il pled. El ha raquintà ch'el vegniva adina gugent tar tatta e tat a Disla. Cun il tat gievan els gugent sper il Rain. Era gieva la famiglia regularmain sin il Lag la Tuma a far bogn. «Quai era in ritual, quel lieu è dal reminent in dals pli bels lieus da forza per mai. Nus vegnin adina fitg gugent a Mustér, perquai che nus sentian era che nus Orliks essan bainvegnids qua», ha Armon Orlik confidà a l'auditori.
Duas gruppas musicalas ed in solist han embellì la surdada dal premi Desertina. Ina giada ils Galiots cun Flavio Huonder, Fabian Huonder e Josef Sgier. Lura la furmaziun Cantus Avis sut la direcziun da Rilana Cadruvi. Laurin Bucheli, in mat dad 11 onns da Segnas, ha sunà plirs tocs sin l'orgelin svizzer. Quellas diversas contribuziuns musicalas han accentuà la festivitad en la halla Cons.
Premi per Simon Camartin …
Auter che la cumissiun e la suprastanza communala na saveva nagin tgi che retschaivia quest onn il premi da renconuschientscha e quel da promoziun. Bleras convischinas e convischins èn vegnids pervia da l'onuraziun dad Armon Orlik. Uschia era Simon ed Oana Camartin. Il president communal René Epp ha supplitgà sin tribuna il laudatur Giusep Giuanin Decurtins.
Lez ha bainbaud revelà il lign. En ses pled ha el enumerà ils merits e la prestaziun da Simon Camartin. Avant 40 onns, a la festa chantunala da chant a Scuol, dirigiva el il Chor viril baselgia da Mustér. Suenter la surdada dal premi da renconuschientscha a l'onurà ha lez sincerà: «Sche jau avess savì tge che ma spetga, avess jau mess si cravatta.» Guardond giu en il public ha el manegià: «Blers auters e bleras autras giu qua en il public avessan merità quest premi dapli che jau. Igl èn blers e bleras che prestan onns ora lavur en il zuppà. In premi meritan era tut quels e quellas che stattan en per la vardad en noss mund zanistrà.»
… e l'Uniun da dunnas Mustér
En las retschas dals preschents e da las preschentas avevan era commembras da l'uniun da dunnas da Mustér prendì plazza. Sco quai che la cussegliera communala da cultura Iris Lombris ha ditg, aveva la suprastanza communala envidà la suprastanza e tuttas presidentas anteriuras da quella uniun. Sco ella ha savì da dir, ha er Irma Camartin, la mamma da Simon Camartin, presidià quella avant onns.
L'uniun da dunnas da Mustér presta blera lavur d'utilitad publica, voluntaria ed en il zuppà. Ella exista dapi hahaias ennà. Sin proposta da la cumissiun ha la suprastanza communala surdà a quella il premi da promoziun Desertina 2026. Las trais suprastantas Aurelia Albin, Leslie Flury ed Ursina Huonder han represchentà l'entira uniun activa cun sias 220 commembras e 60 che sa participeschan a las radunanzas generalas. Madleine Deflorin ha fatg la laudatio per questa impurtanta uniun dal vitg.