-
Bild 1 von 5. Ils pumpiers e la sanitad vi da las lavurs da salvament ord in auto. Bildquelle: RTR, Flavio Deflorin.
-
Bild 2 von 5. Il pli impurtant è da restar ruassaivel e d'esser disciplinà. Bildquelle: RTR, Gionduri Maissen.
-
Bild 3 von 5. Discutar co agir e pudair communitgar è in dals puncts centrals da l'exercizi. Bildquelle: RTR, Flavio Deflorin.
-
Bild 4 von 5. Durant l'exercizi pon ils sanitaris era duvrar las maschinas dals pumpiers. Bildquelle: RTR, Flavio Deflorin.
-
Bild 5 von 5. L'exercizi cumenza en pauc mument, ma l'emprim ston las gruppas vegnir fixadas. Bildquelle: RTR, Flavio Deflorin.
L’ambulanza en la Cadi vegn manada dapi in temp era da pumpiers. Quai surtut durant la stagiun bassa e durant la notg. Uschia datti adina dapli muments, nua che pumpiers ed ils servetschs da salvament e sanitad han da collavurar. Per optimar questa collavuraziun saja necessari d’enconuscher in l’auter, di il manader dal servetsch da salvament Surselva Alex Gisler. Uschia sa mussia nua che mintga organisaziun haja sia fermezza, e nua ch'i saja necessari d’optimar.
RTR ha filmà l'exercizi a Mustér en 360°. Sche vus guardais quest video cun Voss telefonin, lura smatgai sin il titel dal video, lura s'avra l'app da youtube e Vus pudais guardar il video en 360°.
RTR mussa en in video da 360° co l'exercici ha vesì ora
Surtut lauds per lavur dals pumpiers
La collavuraziun haja funcziunà propi optimal. Uschia haja el survegnì resuns da la REGA ma era dals medis da chasa da la Cadi che tut funcziuna il mument bain, di Alex Gisler. Ma optimar possian ins adina. Uschia saja era impurtant da savair tgi che ha tge equipament en ils autos. Dus posts da lavur da l'exercizi s’occupan perquai d’ina vart cun l’ambulanza e tut ils utensils, e da l'autra vart cun ils autos da pumpiers e tut ils utensils avant maun. Tenor il cumandant dals pumpiers Gion Tenner saja la collavuraziun sa mussada sco buna.
La stad stà bler da far
Il servetsch durant la stad 2020 saja stà per part intensiv per ils pumpiers. Uschia hajan els regularmain gìu da sa gidar cun il servetsch da salvament. Durant la stagiun auta saja stà pli pauc da far per ils pumpiers, conferma Gion Tenner.
Ma il servetsch da 24 uras a Mustér na saja betg adina simpel da realisar. Surtut la mancanza da persunas dal fatg saja la sfida principala per in tal servetsch d’ambulanza permanent per la Cadi, di Alex Gisler. Ma els sajan sin buna via e surtut fitg cuntents che la collavuraziun funcziuna – pertge quella saja probabel unica en l’entir chantun Grischun.