Siglir tar il cuntegn

Header

cuntegn

Revistas 2022 Ils lufs procuran vinavant per emoziuns

Da vatgas stgarpadas, tants lufs sajettads sco anc mai ed ina lescha che duess far vegnir tut meglier.

audio
Lufs han chaschunà problems ed én vegnids sajettads
ord Actualitad dals 30.12.2022. Maletg: RTR
laschar ir. Durada: 5 minutas 7 Secundas.

L'onn 2022 era anc giuvens, cura ch'in luf ha procurà l'emprima giada per agitaziun. Sper Sumvitg, sisum la Surselva ha la guardiaselvaschina sajettà in luf problematic. Senza lubientscha da la Confederaziun e sut la clausula generala.

Sajettà tants lufs sco anc mai

En tut ha la surveglianza da chatscha sajettà quest onn 11 lufs. Otg en il rom da la regulaziun da trieps. Tranter auter il muscul problematic M92 dal triep dal Beverin e per sbagl il mastgel dal triep da Moesola. Alura anc il luf problematic a Sumvitg, in luf ibrid en la val dal Rain da Cuera ed il mastgel blessà dal triep dal Pez Bargis (Ringelspitz).

L'onn 2022 hai dà en tut varga 500 stgarps d'animals da niz. Quai è varga il dubel envers l'onn passà e mussa ch'ils lufs emprendan da surmuntar las mesiras da protecziun per proteger las muntaneras.

Ussa era vatgas-mamma

Curt suenter la chargiada dal muvel sin las alps hai dà sin duas alps en la Muntogna da Schons attatgas da lufs sin vatgas-mamma. Ils purs han reagì vehementamain e mess l'Uffizi da chatscha sut squitsch.

La politica naziunala reagescha

La situaziun en il Grischun, dentant era il svilup dals lufs en auters chantuns sco per exempel Glaruna, Vallais, Vad u Giura ha era gì in effect sin il parlament federal. Lez ha quest atun decidì ch'i duai vegnir pli simpel da sajettar lufs:

La decisiun dal parlament federal  ha procurà tar ils purs e las puras per levgiament entant che las uniuns per la protecziun da la natira e las partidas sanestras èn trumpadas.

Il luf vegn cun garanzia era a procurar il 2023 per lingias grassas e muventar las gnervas a purs, politichers ed ufficis.

RTR actualitad 08:00

Artitgels legids il pli savens

Scrollar a sanestra Scrollar a dretga