Cun ina brev averta s'engaschan las spendreras da l'Ospital regiunal Surselva per la partiziun da naschientschas a Glion. Tenor il chantun e la corporaziun da vischnancas Sanasurselva duai la partiziun da naschientschas da l'ospital da Glion vegnir serrada. La FMR ha confruntà ils adressats da la brev averta cun ils quitads e las renfatschas da las spendreras da Glion.
La brev averta publitgada en la gasetta Südostschweiz da las spendreras da l'ospital da Glion è adressada al cusseglier guvernativ Peter Peyer, al president da la Sanasurselva René Epp ed a la populaziun da la Surselva. En la brev averta scrivan las spendreras ch'ellas na possian betg chapir ch'ellas sajan vegnidas infurmadas tras las medias ch'ellas perdian probablamain lur plazza.
I para in donn collateral
«Nus vulessan dir a la populaziun sursilvana che nus sajan er vinavant qua cun nossa partiziun da naschientschas», scrivan las spendreras pled per pled en la brev averta. Ellas hajan giavischà da far in di da las portas avertas en la partiziun da naschientschas. Quai ed er anc autras activitads da promoziun na sajan dentant betg vegnidas lubidas dals organs superiurs da l'ospital.
«Tgi che desista d’ina partiziun da naschientschas, ch’è ina prestaziun uschè impurtanta per famiglias e per il provediment general en ina regiun, è en duair culpants d’argumentar quai envers la populaziun. Ils arguments che nus udin oz, sumeglian plitost ad in donn collateral ch'è sa dà pervi d'in auter svilup», scrivan las spendreras da Glion. E cun quest auter svilup manegian ellas la chirurgia da 24 uras che vegn sistida. Per consequenza sto er la partiziun da naschientschas vegnir serrada.
Remartgas che fan mal
En lur brev publica reageschan las spendreras er sin las remartgas concernent lur cumpetenzas professiunalas. La remartga dal cusseglier guvernativ Peter Peyer che la lavur na saja betg engraziaivla per spendreras ch'accumpognan mo ina u pli paucas naschientschas entaifer in'emna saja per ellas ina constataziun che fetschia mal e na saja betg correcta.
En il text hai num: «Nus spendreras da l'ospital da Glion essan sapientivamain ans decididas per in ospital pitschen per che nus possian accumpagnar las famiglias a moda cumplessiva.» La professiun da spendrera cuntegna bler dapli che l'accumpagnament durant las naschientschas.
I dat avunda spendreras qualifitgadas
Las spendreras crititgeschan l’intenziun da la Sanasurselva da serrar la partiziun da naschientschas «En cas che las delegadas ed ils delegads da la Sanasurselva decidan da serrar la partiziun da naschientschas a Glion la fin dal 2026, vulain nus sco spendreras infurmar che la partiziun da naschientschas na vegn betg serrada pervia da mancanza da forzas da lavur qualifitgadas. Il Grischun dispona da bleras spendreras bain scoladas e cun experientscha. I dat spendreras che n'han nagina plazza, malgrà ch'ellas han bunas qualificaziuns ed experientschas. D’ina mancanza generala da spezialistas e da spezialists na possian ins pia strusch discurrer en il chantun Grischun.
Chapientscha per las finanzas
En la brev publica scrivan las spendreras ch'ellas hajan chapientscha per la situaziun finanziala da l'Ospital regiunal Surselva. Ils ospitals regiunals na sajan dentant betg qua per far gudogns, mabain per segirar il provediment da basa.
Las spendreras scrivan: «En vista al preventiv 2026 essan nus vegnids infurmads ch’ils pertschients da plazzas libras en nossa partiziun na vegnian betg pli occupads. Nus avain gì bunas annunzias ed i ha era dà spendreras en noss team che fissan stadas prontas d'augmentar lur pensum da lavur. Da discurrer sut questas premissas da mancanza da persunal qualifitgà resentin nus sco nunsincer e sco betg fair envers nus ed er betg envers la populaziun sursilvana.»
Sururas senza indemnisaziun
La dumonda co ils pertschients da plazzas vacantas en la partiziun da naschientschas pudessan vegnir cumpensads è in ulteriur tema en la brev averta. Tenor quella haja la direcziun da l'ospital preschentà la soluziun da far servetschs da 12 uras u pichet senza indemnisaziun supplementara e senza perspectiva co las sururas pudessan vegnir cumpensadas.
Uss essan nus en in conflict persunal difficil
Vinavant stat scrit en la brev publica: «D'ina vart stat la tgira e l'accumpagnament da las famiglias fitg a cor a nus. Da l’autra vart vegnin nus strusch da prender si ils pertschients da la lavur che mancan senza far donn a nus sezs a lunga vista.» Las spendreras concludan lur brev averta als responsabels per la sanadad publica en Surselva ed a la populaziun cun in giavisch. Lur patratgs duain cumplettar las bleras perspectivas ch'i dat en connex cun la discussiun davart il futur da la partiziun da naschientschas en l'ospital da Glion.
Il bal è tar ils purtaders da l'Ospital regiunal Surselva
Il schef dal departament chantunal da giustia, segirezza e sanadad, Peter Peyer, è l'emprim adressat da la brev averta da las spendreras da l'ospital da Glion. A la dumonda da la FMR, sch'el chapeschia ils quitads da la spendrera, respunda Peter Peyer ch'il problem saja la sminuziun da las naschientschas en l'ospital da Glion: «Ils davos tschintg onns hai anc dà en media 156 naschientschas a Glion.» La glieud vegnia pli e pli veglia e la demografia saja negativa en l'entir chantun, respunda Peter Peyer. «Or da quest punct da vista chapesch jau ils quitads da las spendreras.»
Far attent è legitim
René Epp, il president da la SanaSurselva è il segund exponent che vegn pledentà en la brev averta. El scriva: «Che las spendreras ans rendan attent, sch’ellas fan quitads è legitim.» De facto saja dentant da dir il suandant, scriva René Epp: «Senza sustegn finanzial dal chantun resp. senza che la partiziun da naschientschas è en il futur sin la glista da l'ospital da Glion, n'èsi betg pli pussaivel da purtar quella finanzialmain.» L'accumpagnament avant e suenter las naschientschas sco era las prestaziuns da ginecologia e pediatria sajan dentant vinavant garantidas, uschia René Epp. «Plinavant sto la Sanasurselva ensemen cun la Reit da Sanadad en general far ponderaziuns co il provediment da basa da sanadad duai vesair ora en il futur.» Las sfidas sajan grondas, gist en connex cun las investiziuns necessarias che spetgian l'ospital.