Ina gruppa da nov persunas è sa radunada a la staziun da Valendau-Sagogn. Davant els stat in um pli vegl cun egls vivs e blau clers, ed in chaun vi da la tschinta. Cun els: ina dunna giuvna cun chavels nairs ed ina mappa enta maun.
Oz ha lieu in'occurrenza da fufragnadi per tut quels che faschessan gugent ina scolaziun da rangers. Avant ch'ins po far quai, ston ins numnadamain prender part ad in tal di. Jean-Marc Riedmann, l'um cun egls blaus, lavura dapi trais onns sco ranger en la Ruinaulta. I plaschia fitg bain ad el, di el. «Jau di adina uschia: jau sun ina battaria, e la natira è mes accu.»
La gruppa va oz da la staziun da Valendau fin a la staziun da Versomi. Sin via raquinta il ranger da sias experientschas e respunda dumondas. Era Laura Walther maina la gruppa oz avantmezdi – ella è co-manadra dal curs da studi Ranger en il center da scolaziun a Lyss.
Cura che nus n'avain betg anc fatg il di da fufragnadi, avain nus mintgatant gì glieud, ch'ha cumenzà a far il studi e ch'aveva in fauss maletg da la lavur d'in ranger.
Cun quest di da fufragnadi vul ella evitar, ch'insatgi cumenzia la scolaziun ch'ha ina faussa idea da la lavur d'in ranger. In ranger fetschia ina massa chaussas, di la dunna giuvna – er observar animals e giudair il temp en la natira tutga latiers, ma la gronda part da la lavur consista da communicaziun.
La scolaziun «ranger» en il chantun da Berna custa passa 10'000 francs – e perquai vul Laura Walther, che las persunas sajan segiras, ch'entschaivan là.
-
Bild 1 von 4. La gruppa sa metta sin via – Jean-Marc Riedmann oravant. Bildquelle: RTR.
-
Bild 2 von 4. Bildquelle: RTR.
-
Bild 3 von 4. In stgalim sin la stgala è rut – il ranger marchescha il lieu. Bildquelle: RTR.
-
Bild 4 von 4. Bildquelle: RTR.
En in lieu è rut in stgalim d'ina stgala – Jean-Marc Riedmann marchescha el. «Quai è insatge tipic ch'ins fa sco ranger – scuvrir ed annunziar donns», di el.
Las visitadras ed ils visitaders dal curs da fufragnadi èn arrivads da tut la Svizra. Ils blers dad els han gugent la natira e vulessan passentar temp giuadora. Ma er il contact cun ils umans fa plaschair a blers dad els. Precis quest contact possia mintgatant esser negativ, di Jean-Marc Riedmann.
En cas d'in conflict na duess ins gea betg daventar agressiv u dad aut – betg tschertgar la dispita, mabain empruvar propi da chattar ina soluziun.
Suenter quatter uras datti l'emprima pausa – gentar sin ina plazza da picnic. Franc vegnan intgins ad esser motivads anc dapli d'eleger il studi «ranger» – auters vegnan forsa anc ina giada a studegiar, sche quai è propi la dretga via per els.
-
Bild 1 von 3. Bildquelle: RTR.
-
Bild 2 von 3. Bildquelle: RTR.
-
Bild 3 von 3. Bildquelle: RTR.