Siglir tar il cuntegn

Header

audio
Relasch da Matias Spescha è turnà a Trun en la patria
Or da Actualitad dals 24.05.2023. Maletg: RTR
laschar ir. Durada: 2 minutas 56 Secundas.
cuntegn

Trun Cultura L’ovra da Matias Spescha è arrivada a chasa

video
Ovras da Matias Spescha èn puspè a Trun
Or da Telesguard dals 13.06.2023.
laschar ir. Durada: 3 minutas 26 Secundas.

Il viadi da Bages en Frantscha dal Sid fin a Trun è stà in lung viadi. Per la figlia da l'artist Venice Spescha, èsi bel da vesair ch’il relasch da ses bab è uss returnà en la patria. La satisfacziun è gronda, ma uss spetga la lavur d’endrizzar l’exposiziun ed uschia era da mussar las ovras. Cunquai che Matias Spescha ha malegià gronds maletgs è la halla da l’anteriura fabrica a Trun ideala per l’exposiziun, di Venice Spescha. Ella possia gia uss s’imaginar bain co tut guardia or ils 17 da zercladur, er il di da natalizi da l'artist, ch’è naschì il 1925 e mort il 2008.

Gronda lavur per ils curaturs

Il concept per l’exposiziun è gia daditg sin maisa, uss ch’ins vesia dentant las ovras en realitad saja quai anc ina giada auter e fitg impressiunant, di il curatur Peter Fischer. Las proximas emnas vegnian fitg interessantas da pudair giugar cun las ovras e metter ellas optimalmain a la glisch. Era saja bel da pudair lavurar en in pitschen team, communabel cun Venice Spescha e cun Markus Hilfiker, di Peter Fischer, ch’ha gronda experientscha en organisar exposiziuns. Il relasch da Matias Spescha è dentant anc betg cumplettamain a Trun. Il mument è circa in terz da las ovras transportada da Bages a Trun. Ina gronda part spetga anc sin il transport da Turitg a Trun. L’entir relasch cumpiglia circa 1’000 ovras.

Halla d’exposiziun vegn anc finida

Il mument vegn anc lavurà en l’anteriura halla da la fabrica a Trun. Dapertut stattan paraids grondas alvas or da lain. Sin quellas vegnan exponids ils maletgs da Matias Spescha. Ma era ils gronds paravents vegnan a chattar in plaz en ina da las salas grondas, di Venice Spescha.

Or da l'archiv

RTR actualitas 11:00

Artitgels legids il pli savens