Tranter il favrer e l'avrigl ha ina e scadin interessent ed interessenta pudì sa participar ad ina retschertga digitala da la vischnanca da Tujetsch. Perquai aveva ella creà ina plattafurma. En elecziun èn stads sis projects per infrastructura dal temp liber.
Be la punt da peduns n'è betg giavischada
Dals sis projects preschentads vegnan quatter beneventads cleramain. Uschia èn quai in meglier diever dal plaz sper la halla a Dulezi, l'infrastructura da zipline, in parc da velos ed in parc da raiver en la vischinanza dal Lag da Claus a Surrein. In cler pli hai era dà per la plazza da gieus sut il Bogn Sedrun. L'idea d'ina punt per peduns tranter Gionda e la plazza da gieus sut il bogn è però vegnida refusada cleramain.
Tut en tut èn 307 persunas s'annunziadas sin la plattafurma digitala da cooperaziun. Da quellas han 255 registrà lur resun, mo sulettamain 140 han lura era transmess quel.
Tschintg projects en mira
Sin fundament dals resultats vegnian ils tschintg projects persequitads vinavant da la suprastanza communala. Quels projects sajan gia formulads concretamain ed ins sappia pli u main tge che quels custian. Martin Cavegn discurra d'ina summa totala da radund 1,2 milliuns francs.
Sulet la plazza da gieus sut il Bogn Sedrun è calculada cun custs tranter 800'000 e 900'000 francs. Quest project duai avair l'emprima prioritad. La plazza da gieus duai vegnir engronida e daventar pli attractiva, tranter auter cun novas pussaivladads da sa divertir e da star da cumpagnia.
Credits vegnan tractads en il proxim preventiv
La decisiun finala da realisar ils projects ha il suveran. Ils credits vegnian ins a dumandar en connex cun la tractaziun dal preventiv. Schebain quai saja anc quest onn il cas, na saja anc betg decidì, uschia Cavegn.
Avant che far la retschertga digitala era la suprastanza communala da Tujetsch s'inscuntrada cun vischinas e vischins per discutar in tschuppel ideas per projects futurs. Sin fundament dals discurs e giavischs exprimids lura aveva la suprastanza communala fatg ina schelta da las ideas.