Il deputà Hanspeter Bundi ha dacurt inoltrà ina dumonda parlamentara en il Cussegl grond per survegnir infurmaziuns davart ils progress e las intenziuns da la regenza areguard quest project.
En sia dumonda vul Hanspeter Bundi savair, sch'il chantun haja gia examinà pussaivladads per cuvrir parzialmain la via H19 en il sectur dal quartier Sontga Clau e sche la regenza prevesa d'integrar quest project en la planisaziun chantunala da las vias.
Emissiuns da canera considerablas
Il traffic sin la H19 è s'augmentà ils davos 60 onns sin passa 4'000 vehichels mintga di, quai che chaschuna emissiuns considerablas. Cun metter il traffic en in chanal pudessan ins reducir considerablamain la grevezza da canera e crear novas pussaivladads per vias da velo e da peduns.
Il model directiv da planisaziun dal territori da la vischnanca exista dapi bunamain trais onns e cuntegna propostas per sviluppar la citad e las vischnancas vischinas, inclusiv ils sviaments da la H19. In model concret per il sviament è vegnì preschentà gia en ina exposiziun l'onn 2022.
Ils deputads sursilvans èn perina
En ses program da legislatura 2022-2025 ha la regenza fixà la basa per cuvrir la H19. Il deputà Hanspeter Bundi spetga en la proxima sesida la fin d'avust ina resposta da la cussegliera guvernativa responsabla Carmelia Maissen ch'enconuscha il project. Vinavant vul el savair sch'il chantun haja fatg examinaziuns en chaussa e sch'i dettia studis.
Ils deputads da la regiun sustegnan l'iniziativa da Hanspeter Bundi, sco ch'el ha tradì a la FMR. I dettia in interess communabel per reducir la canera e per meglierar il traffic a Glion.