Dapi la votaziun dal pievel dals 28 da settember 2025 èsi cler: l'imposiziun da taglias sin la valur da l'atgna locaziun vegn abolida. Sco cumpensaziun dastgan ils chantuns incassar en l'avegnir ina taglia speziala sin immobiglias secundaras. Il mument che las midadas entran en vigur, fixescha il Cussegl federal. La regenza grischuna ha gia prendì decisiuns da princip per sa posiziunar a temp e per sclerir co proceder vinavant.
L'aboliziun da l'imposiziun da taglia sin la valur da l'atgna locaziun porta al chantun Grischun circa 40 milliuns francs per onn main entradas. Sco cumpensaziun vul la regenza introducir ina taglia chantunala speziala sin immobiglias secundaras che vegnan utilisadas per gronda part a l'agen diever.
Regulaziun concisa per las vischnancas e per las baselgias
Cun abolir l'imposiziun da taglia sin la valur da l'atgna locaziun sin immobiglias secundaras perdan las vischnancas mintg'onn circa 30 milliuns francs.
Er las baselgias èn pertutgadas: La baselgia evangelica-refurmada dal chantun perda var 500'000 francs, las plaivs evangelicas 1,7 milliuns e las plaivs catolicas 1,8 milliuns francs. Perquai vul la regenza stgaffir ina basa legala che permetta a las vischnancas ed a las baselgias d'incassar ina taglia speziala sin immobiglias sco cumpensaziun.
La reglamentaziun duai esser concisa: Il chantun definescha ils princips da la taglia immobigliara speziala, las vischnancas e las baselgias decidan sch'ellas vulan introducir ina tala taglia e fixeschan en cas l'import da la taglia.
Examinar las deducziuns vertentas
La Confederaziun surlascha als chantuns la decisiun, sche investiziuns en mesiras per spargnar energia e per proteger l'ambient, per lavurs da la tgira da monuments sco er per ils custs da demontascha per edifizis cumpensatorics novs pon vegnir deducidas vinavant da las entradas suttamessas a la taglia. Questas deducziuns existan gia oz.
La regenza grischuna vul examinar sch'ellas duain vegnir mantegnidas suenter che l'imposiziun da taglia sin la valur da l'atgna locaziun è vegnida abolida.
Co vinavant?
L'administraziun chantunala da taglia elavura las disposiziuns legalas necessarias. Il Departament da finanzas e vischnancas vegn a dar en consultaziun il project. Pli tard vegn la regenza a deliberar sia missiva per mauns dal Cussegl grond.
Cura che la taglia speziala sin immobiglias secundaras vegn introducida e cura che l'imposiziun da taglia sin la valur da l'atgna locaziun vegn abolida dependa da la decisiun dal Cussegl federal. L'entrada en vigur è previsa il pli baud per il 1. da schaner 2028.