La scola speziala «Schulheim» a Cuira è plaina. Ils 124 plazs per scolaras e scolars che dovran sustegn supplementar èn tuts occupads. E quai haja consequenzas negativas per ils scolars e las scolaras sco era per il persunal, di il president da la fundaziun dal «Schulheim» Reto Löpfe. La pli gronda problematica saja dentant ch'uffants che dovran sustegn supplementar stoppian restar en las scolas regularas enfin ch’i dettia puspè plaz.
Nus essan occupads cumplettamain.
Glisch verda per nova purschida a Tumein
Cunquai ch'il «Schulheim» a Cuira n'ha per il mument naginas resursas da surpigliar novs scolars e novas scolaras, damai ch'els èn – sper il manaschi dal mintgadi – era anc occupads cun schlargiar lur purschida, ha il chantun Grischun dà glisch verda per ina ulteriura scola speziala. A Tumein datti a partir da la proxima stad plaz per 13 uffants che dovran sustegn. Prevesida è ina classa da scolina ed ina classa da scola primara. Custs: radund 1,5 milliuns francs – quai ina giada enfin la fin da l’onn 2027. Quella nova purschida vegn la Casa Depuoz cun sedia a Trun a surpigliar, malgrà che Tumein n’è betg gist situà dasper Trun. Il manader da la Casa Depuoz Matthias Gutmann declera ch’il chantun haja tschentà la dumonda. E suenter avair ponderà bain, hajan els surpiglià questa nova incumbensa. Las capacitads sajan stadas avant maun.
Scola speziala en il medem edifizi sco la scola regulara
Questa nova scola speziala è situada en la scola regulara a l'ur dal vitg da Tumein. Gia a partir dal proxim onn da scola duessan 13 scolaras e scolars pudair ir là a scola. Da far datti anc inqual chaussa: Saja quai drizzar en las stanzas – sa chapescha als basegns dals uffants – u era da tschertgar nov persunal.
Nus essan spert vegnids a la conclusiun che nus vulain cumenzar cun in nov team.
Tschertgadas vegnan diversas clamadas: da scolastas curativas sur assistenzas da classa enfin tar persunal da tgira. Munta quai che la Casa Depuoz che ha la sedia a Trun vul expander vers Cuira? Na, quai na saja betg il cas, manegia Matthias Gutmann, e tuttina ch’i dettia forsa in effect secundar. Munta: ch’in scolar ubain ina scolara sa decidia da far in emprendissadi en l'instituziun a Trun.
Per il mument è quella nova purschida a Tumein limitada sin tschintg enfin diesch onns, tut tenor sco la capacitad da plaz sa sviluppescha en la citad da Cuira. Co quai va suenter vinavant stat anc scrit en las stailas.
Or da l'archiv:
