Sco il num «Velocheck» di, vegn examinà sch'il velo ha tut quai che saja obligatoric e che tut funcziunia, di Kerstin Jerger da ProVelo Grischun. Guardar sch'ils frains funcziuneschan, sch'igl ha reflecturs davant e davos, e sch'ils pneus èn anc buns.
La finamira dal «Velocheck» è ch'igl ha uschè blers velos sco pussaivel sin via. Che nagin na po pli duvrar la stgisa ch'il velo n'è betg en urden.
Sch'igl è da basegns pon ins er far sez pitschnas reparaturas gist al lieu. ProVelo Grischun stat a disposiziun sco sustegn cun l'expertisa ed er ina massa guaffens èn a disposiziun. Tocs da reserva sco per exempel novs tscheps dal frain per midar, sto dentant mintgin e mintgina purtar sezza.
Sch'insatgi vul far ina reparatura metta ProVelo Grischun a disposiziun ina gronda schelta da guaffens. Sch'i dovria in guaffen specific ed in zic pli spezial n'haja betg mintgin simplamain a chasa quel, di Kerstin Jerger. La purschida n'è betg nova – quella datti gia dapi il 2023 sut il num «Offene Velowerkstatt». Davent da questa primavaira è il num «Velocheck» nov e la cadenza dad ina giada il mais è sa midada sin duas giadas il mais. Quai mintgamai l'emprima e terza mesemna dal mais.
«Velocheck»
-
Bild 1 von 5. Guaffens vegnan mess a disposiziun da ProVelo Grischun. Quai è in grond agid, perquai che betg mintgin e mintgina ha a chasa tut ils guaffens specifics per far pitschnas reparaturas vi dal velo. Bildquelle: RTR.
-
Bild 2 von 5. Kerstin Jerger da ProVelo Grischun gida questa saira cun sia expertisa sch'insatgi ha basegn da cussegl. Bildquelle: RTR.
-
Bild 3 von 5. Volker Timme è aposta vegnì cun ses velo da Maiavilla a Cuira per pinar insatge vid in pedal da ses velo. Bildquelle: RTR.
-
Bild 4 von 5. Flurina Schloeth da Cuira schubregia ses velo ch'è gia in model in zic pli vegl. Ella stuess er midar ils frains e drizzar ils girs. Bildquelle: RTR.
-
Bild 5 von 5. Marco Oertli da Cuira che stat gist vis à vis il Planaterra 11 ha in problem cun ses girs. Cun agid da l'expertisa ed in guaffen spezial po el puspè drizzar tut. Bildquelle: RTR.
Il dumber da participants e participantas che fetschian diever da la purschida varieschia e saja er in zic dependenta da l'aura. Mo i sajan adina tranter trais e diesch persunas per giada che vegnian en il Planaterra 11 cun lur velo, di Kerstin Jerger da ProVelo Grischun. Ils resuns sajan positivs. Quai conferman er las trais persunas ch'èn da la partida la saira da la visita da RTR. Gist ils guaffens specifics e l'expertisa vegn stimada fitg.