San Murezzan
Il suveran decida davart in credit general da 114 milliuns francs per il project «Islas». Quel cumpiglia tranter auter ina nova halla da glatsch. Tar in resultat positiv da la votaziun pudess la vischnanca lura cuntinuar cun il plan cumplessiv Islas Ludains. Il plazzal da construcziun dal project «Islas» da la vischnanca da San Murezzan sa chatta ordaifer il vitg vers Champfèr.
Mustér
La populaziun da Mustér ha da decider davart in credit da 3 milliuns francs per cumprar l'areal «Hess». Quel cumpiglia ina gronda parcella en il center dal vitg, sco era sulom agricol. Or dal toc en il vitg duai dar in lieu da sentupada, senza dentant gia avair definì exact tge che vegn fatg. Las parcellas agricolas vegnan duvradas per la megliuraziun.
Sco segund project decidan ils da Mustér davart la revisiun totala da la planisaziun locala. Per l'ina vegn reducì la surfatscha da la zona da bajegiar, per l'autra vegnan intginas parcellas mobilisadas.
Scuol
L'hotel tradiziunal Chasa Paradis a Ftan èsi previs da stgarpar giu dal tuttafatg. En l'avegnir duai quai dar quasi in terz quartier en la fracziun da Ftan – in resort cun in hotel cun wellness, restaurant, trais chasas cun abitaziuns commerzialisadas, ina chasa per velos e bikes, ina chasa per il persunal ed ina garascha sutterrana.
Per pussibilitar quai dovri ina revisiun parziala da la zona da hotel.
Tavau
La situaziun da traffic tranter la staziun da tren Tavau Vitg, la staziun da val Parsenn e la plazza da parcar è nuncuntentaivla. Il plaz limità ed il bler traffic chaschunian adina puspè situaziun privlusas. Perquai lavura Tavau dapi il 2021 vi d'in «Masterplan» per il center dal vitg. En in emprim pass duai vegnir realisà il nov center da traffic («Verkehrsdrehscheibe»). Quel cumpiglià in nov terminal da bus, ina nova staziun per il tren ed in nov traject da via. Il credit da 2,1 milliuns francs vegn duvrà per elavurar il project da construcziun. Tenor stimaziuns duess quest project da construcziun che vegn fatg en in segund pass custar 108 milliuns francs, dus terz duai surpigliar la vischnanca.
La segunda votaziun pertutga l'ospital Tavau, quel duai survegnir ina sdebitaziun. La vischnanca duai pia surpigliar ils debits – tut en tut 14,11 milliuns francs. 8,45 milliuns èn emprests da la banca che la vischnanca surpigliass. Vitiers duess la vischnanca desister da tut las pretensiuns envers l'ospital. Quai duess meglierar il quint da l'ospital per pussibilitar in svilup da l'ospital. En in proxim pass duai alura vegnì decis davart la renovaziun u reconstrucziun da l'ospital. Il project preferi da la vischnanca custass radund 70 milliuns francs – n'è dentant anc betg elavura cumplainamain.
Arosa
Arosa vul ina corporaziun da chalur, pervi da quai sto la populaziun decider davart la construcziun e la gestiun. Ad Arosa vegnan actualmain 71% dal consum annual d'energia termica cuverts cun ieli da stgaudar, 14% cun laina e 9% cun pumpas da chalur. Cun in sistem da chalur a distanza duai la quota d'energias regenerablas vegnir augmentada e la dependenza d'energias fossilas reducida.
En pli votescha Arosa davart ina nova concessiun per l'ovra electrica Pradapunt per utilisar il potenzial idroelectric da la Plessur tranter Litzirüti e Pradapunt. Per quai sto vegnir midà il reglament da protecziun.
Domat
L'implant da glera La Punt/Rehanau en il territori Plong Vaschnaus duess vegnir schlargia. Per quai sto la planisaziun locala vegnir adattada. Ina part essenziala dal project è la regulaziun da la recultivaziun respectiv la renatiralisaziun da las surfatschas exauridas.
Val
Enta Val duai la chava da crappa da la firma Truffer vegnir engrondida, per pussibilitar in manaschi a lunga vista. Per quai sto la planisaziun locala vegnir revedida parzialmain.
Favugn
La constituziun communala da Favugn è da l’onn 2000 ed è vegnida actualisada punctualmain, uss duai ella vegnir modernisada. Ella na vegnia betg midada fundamentalmain, è scrit en la missiva. I vegnia dentant simplifitgà e clerifitgà incumbensas e dretgs. Tranter auter duain elecziuns da nov esser a l'urna. Plinavant vegnan periodas d'uffizi terminadas sin 4 onns ed i vegn definì las limitaziuns da reelecziuns.
En pli duess vegnir introducida ina lescha da transparenza a Favugn. Entras quai duai la populaziun survegnir invista en documents uffizials. E la populaziun votescha davart in augment da la taglia da midada da maun e da la taglia sin immobiglias.
Flem
Per la fin da la legislatura 2025 enfin 2028 sto la populaziun da Flem eleger ina nova persuna en la suprastanza communala, per quai che Laurène Gartmann ha demissiunà. Mintga persuna cun dretg da votar po vegnir elegì, ina candidatura uffiziala n'è betg necessaria.
Ilanz/Glion
La populaziun sto decider davart in credit da 1,65 milliuns francs per schlargiar la via e construir in nov passape ed ina nova fermada per l’auto da posta.
Claustra
Il president communal Hansueli Roth ha dà sia demissiun per ils 31 da mars 2026. Uschia sto la populaziun da Claustra eleger ina successiun per il rest da la perioda d’uffizi 2025 fin 2028. A disposiziun sa metta Christian Kindschi. Sch'el vegn elegì resta el fin l’onn 2030 president, perquai che la vischnanca ha decidì ina perioda da temp da tschintg onns per il presidi, quai è dentant in cas singular per questa giada. La nova presidenta u il nov president entra en uffizi il prim d'avrigl 2026.
En pli vul la vischnanca construir in Trailcenter en il territori Rütiwald. Per il project da circa 260’000 francs è necessari ina revisiun parziala da la planisaziun locala.
Era il preventiv ed il pe da taglia ston vegnir approvads da la populaziun da Claustra. Il budget prevesa in resultat gulivà cun in pitschen plus da radund 11'000 francs.
Samignun
La vischnanca vul introducir ina lescha da persunal per la vischnanca. La regulaziun enfin uss vala dapi il 1998 e n'è betg vegnida adattada dapi lura. La nova lescha duai stgaffir dapli transparenza e reglar pli cler chaussas ch'eran fin uss betg integradas. Cun la nova lescha vegnan las vacanzas auzadas per collavuraturas e collavuraturs da la vischnanca, da 20 dis sin 25. Persunas sur 60 survegnan 30 dis. Plinavant vegn introducì in sistem da paja tenor stgalims da funcziun e classas da paja – quai per meglierar la transparenza.
Plinavant duai dar ina nova lescha da pumpiers. Era qua vai per actualisar las regulaziuns da fin uss.
Sco terz project datti ina revisiun da la lescha da scola. Quai sco consequenza da las midadas ch'il chantun ha fatg en la lescha da scola. Tranter auter vegn integrà che la scolina è uss obligatorica.