La fin d'emna dals 26 fin ils 28 zercladur ha puspè lieu il festival a Cuira tut deditgà a l'art urban ubain per englais: «street art». Il festival ch'aveva fin uss num «Street Art Festival» turna quest onn en ed enturn la citad veglia a Cuira.
Artistas ed artists d'Asia, Europa, Australia ed era dals Stadis Unids vegnan a transfurmar la citad veglia da Cuira en ina gallaria sut tschiel avert. Tranter auter vegni a dar 11 novs uschenumnads «murals», picturas sin entirs mirs da bajetgs, ma era picturar live en la citad veglia, concurrenzas d'artistas ed artists da graffitis e guidas tras la citad. Il «Wand Festival» vegn pia ad esser in'occurrenza fitg colurusa e creativa cun purschidas per grond e pitschen.
La chalira è ina sfida
Gia dapi ils 12 da zercladur èn intgins artists ed artistas qua per picturar las fatschadas. E las cundiziuns na pudessan betg esser meglras cun la bell'aura.
-
Bild 1 von 7. Bener Park, Gäuggelistrasse 60. Il purtret «The Travellers» a la fatschada dal Bener Park mussa dus buobs che l'artist aveva fotografà en ina metro. Il mural è da l'artist australian Fintan Magee. Bildquelle: RTR.
-
Bild 2 von 7. Fintan Magee. L'artist vegn da Sydney en l'Australia ed è in dals pli impurtants ‹Public Artists› da l'Australia. Ses murals tractan da tensiuns socialas e co maletgs pon separar u colliar cuminanzas. Bildquelle: RTR.
-
Bild 3 von 7. Goldgasse/Kufpergasse: Lungas tractativas per dastgar malegiar. Che questa paraid en la citad veglia po vegnir malegiada, na sa chapescha betg da sez. Suenter avair la lubientscha da l'anteriura pictura han els anc gì da guardar cun ils possessurs ed era cun la tgira da monuments. Bildquelle: RTR.
-
Bild 4 von 7. Il maletg vegl. Oriundamain aveva ina scolara da la scola chantunala malegià la fatschada en il rom da sia lavur da diplom. L'organisaziun dal Wand Festival ha lura prendì si contact cun ella e survegnì la lubientscha da surmalegiar ses maletg. Bildquelle: Wand Festival.
-
Bild 5 von 7. Elisa Capdevila. Sur festivals e projects en l'Europa ed ordaifer ha l'artista spagnola bajegià si ina preschientscha internaziunala. Ils ultims onns ha ella approfundà pli e pli sia pratica d'atelier e perfecziunà sur quai ses access a la pictura murala. Bildquelle: RTR.
-
Bild 6 von 7. Grünbergstrasse 3. L'ovra d'art da l'artista australiana Georgia Hill embellescha il nov edifezi da la rait dal spazi cultural a Cuira. Bildquelle: RTR.
-
Bild 7 von 7. Georgia Hill. L'artista australiana Georgia Hill è enconuschenta per lavurs ed installaziuns tipograficas e monocromas. Lingua ed architectura chapescha ella sco puntanadas che portan regurdientschas ed experientschas. Bildquelle: RTR.
Però è la chalira ina sfida per lavurar vid la fatschada, las strategias da las artistas ed ils artists èn sco era per tuts: Lavurar pli baud la damaun e pli tard la saira. La Finamira è, ch'ils maletgs èn a fin sin l'entschatta dal festival.
Sco Australian è quai aura perfetga per mai.
L'artista spagnola Elisa Capdevila malegia en la citad veglia, sco suletta persuna ha ella be survegnì in palancà per crear si'ovra e quel è ina sfida:
Jau m'hai ars gia pliras giadas vid il palancà.
Dentant datti era artistas ed artists ch'èn tut cuntentas cun la situaziun da l'aura oravant tuttas e tuts èn quai l'artista Georgina Hill e l'arist FIntan Magee ch'èn da l'Australia ed giaudan l'aura chauda e bella. Georgina Hill vesa la chalira cun optimissem: «Igl è meglier da lavurar en il sulai sco en la plievgia»
Avunda paraids?
11 novs murals datti cun l'ediziun dal Wand Festival 2026. Cumenzà avevi tut pitschen cun in unic mural: «Il festival è sa sviluppà enorm! Da nagin sustegn e nagina finanziaziun ad ina bler meglra situaziun da partenza uss. A l'entschatta devi be in mural ed in pitschen stan. Oz avain nus 11 murals, 30 maletgs che vegnan malegiads live durant il festival, fin a 40 stans ed in program da basa – igl è creschì! Finalmain essan nus là, nua che nus vulevan schon adina esser», declera Fabian Florin il svilup dal festival.
Cun la finiziun da l'ediziun 2026 vegni a dar en tut 36 murals a Cuira, ina vasta ritgezza da talas ovras d'art. Ed era sch'i po esser ina sfida e blera lavur organisatorica da chattar las paraids, dettia quai anc avunda paraids per malegiar, era suenter questa ediziun cun 11 novs murals:
Igl ha anc adina bler potenzial.
«Igl ha anc adina bler potenzial. Al cumenzament eran nus plitost decentral, uss en las ultimas duas ediziuns puspè pli centrals. Ins vesa, ins chatta adina puspè qua e là insatge, che va a prà», di l'iniziant dal festival, Fabian Florin. Plaunsieu sajan ins visibel sin il parchet internaziunal, i vegnia percepì sin l'entir mund e la visiun saja, ch'i daventia in'onur per artistas ed artists da vegnir qua a Cuira per malegiar. Uschia possia vegnir purtà en il mund, che Cuira ed era il chantun Grischun saja in lieu impurtant tge che pertutga il «street art», manegia l'iniziant vinavant.
Dapli schlantsch e meglra recepziun cun il num nov
La midada dal num na vegn betg per casualitad, il comité d'organisaziun dal festival vesa sia incumbensa da render perceptibel la cultura urbana e da purtar a la populaziun tut sias fassettas creativas.
Sut la noziun Street Art na pon (anc) betg tuts s'imaginar insatge.
«Sut la noziun Street Art na pon (anc) betg tuts s'imaginar insatge. Perquai vulain nus dar dapli clerezza cun il nov num dal festival. Il cor da nossas occurrenzas èn «murals», pia fatschadas da chasas che vegnan picturadas. Perquai avain nus da nov num fitg simpel: «Wand Festival», uschia Thom Businger.