La staziun intensiva da l’ospital chantunal a Cuira cumpiglia ad interim 12 enstagl da 10 letgs. Quai saja ina soluziun temporara per la stagiun d’enviern. Quella possia l'ospital dentant be realisar cun transferir persunal d’autras partiziuns sin la staziun intensiva. Quai ha confermà il post da communicaziun da l'ospital chantunal.
Situaziun tendida
Nov dals dudesch letgs sin la staziun intensiva èn occupads, set cun pazientas e pazients da corona. Per schluccar la situaziun, tgira l'ospital da Samedan mumentan trais ulteriurs pazients da Cuira. Mardi saira era la staziun intensiva lura plaina a Samaden – mesemna en damaun avevi dentant puspè in plaz liber. La situaziun saja fitg volatila. Quai ha ditg il schefmedi da l'ospital da Samedan, Patrick Egger.
Accidents da skis betg il problem
Be 1% da las persunas che fan in accident sin pista sa tschentan sin la staziun intensiva, ha ditg Patrick Egger. Ultra da quai restian quellas persunas be singuls dis sin la staziun intensiva, cuntrari a pazientas e pazients da covid-19 che dovrian per part duas emnas ditg tgira.
Dus letgs dapli a Cuira
Avant trais emnas aveva la regenza grischuna communitgà, ch’ins veglia augmentar ils letgs sin la staziun intensiva permanentamain. La soluziun actuala na saja dentant betg adattada. Per in augment permanent n'haja l’ospital anc betg chattà persunal.
