Il mars avevan anc 54% dals dumandads e da las dumandadas inditgà ch'els veglian sa laschar vaccinar u hajan gia survegnì ina vaccinaziun. Fin l'entschatta da fanadur è quest dumber creschì sin 63%. En total èn gia 60% dals dumandads vaccinads almain ina giada. Quai vul dentant er dir, che sulettamain 3% dals dumandads èn anc pronts da sa laschar vaccinar immediat. Ulteriurs 12% han inditgà ch'els veglian anc spetgar. Per in quart dals dumandads na vegn ina virola betg en dumonda. Quest dumber è dapi l'entschatta da la retschertga constant.
La retschertga da Sotomo mussa plinavant che las differenzas tranter las regiuns linguisticas èn sa diminuidas – differenzas datti cunzunt tranter las citads e las regiuns champestras. En las citads grondas è la prontadad da sa laschar vaccinar pli gronda.
La differenza tranter las schlattainas è percunter scumparida – dentant betg quella tranter las generaziuns. En general sa mussa: pli vegl e pli gronda che la prontadad è – pli giuven e pli pauc ch'ins vul sa laschar vaccinar. Tar las persunas sur 75 onns na vulan per exempel sulettamain 10% insumma betg sa laschar vaccinar. Tar la gruppa tranter 15 e 24 onns na vulan 30% betg sa laschar vaccinar.
Facturs socio-economics e politics
Pli bler ch'insatgi gudogna e pli pronta che questa persuna è da sa laschar vaccinar. Interessant è dentant – la paja ha in pli grond effect sin la prontadad che la scolaziun. Las differenzas sa mussan dentant er tar las differentas branschas. Persunas che lavuran en ina sparta scientifica, mussan ina gronda prontadad per la vaccinaziun – tut auter è la situaziun en il sectur agricul, dentant er en spartas nua che las persunas han bler contact cun autras persunas, sco per exempel en il sport, la gastronomia u la vendita.
Grondas differenzas datti era tranter las partidas politicas. Cunzunt ils aderents e las aderentas da la PPS crodan en egl. Passa la mesadad na vul insumma betg sa laschar vaccinar. Qua gioga cunzunt la sceptica envers la scienzia in'impurtanta rolla. Er tar ils Verds è la sceptica in zic pli gronda. Ils 15% che na vulan dentant betg sa laschar vaccinar na stattan betg en cumparegliaziun cun ils 51% da la PPS. En cumparegliaziun cun l'ultima retschertga dal mars è la prontadad dentant creschida tar omaduas gruppaziuns.
Maioritad per il certificat da Covid
Il certificat da Covid duai cumprovar ina vaccinaziun, in test u ch'ins è gia guarids suenter ina infecziun cun il coronavirus. Avant curt è vegnì lantschà il referendum cunter la nova lescha da Covid-19 – quai cunzunt pervi da quest certificat. Actualmain sa mussa quai dentant, che 61% da la populaziun è per il certificat – 35% cunter il certificat.
Er qua sa mussan grondas differenzas tranter las partidas. La pli gronda resistenza datti da la PPS – quai cun 62% dals dumandads. Il pli grond sustegn datti dad aderents da la PS ed ils Verd-liberals. L'argument il pli frequent cunter il certificat è, ch'el duai represchentar ina sort obligatori da sa laschar vaccinar. Quai dian 43% dals dumandads.
Er en avegnir far vacanzas en Svizra
Ord la retschertga resulta er che la crisa da corona ha in'influenza sin las vacanzas dals Svizzers e las Svizras. 35% dals dumandads han inditgà ch'els vulan er en l'avegnir far pli savens vacanzas en Svizra. E var 40% dals dumandads vulan ir pli pauc en vacanzas en l'exteriur.
