Damai che la gruppa n'ha betg bandunà il lieu, ha la polizia circumdà la demonstraziun nunlubida ed era controllà las persunas. Tschients persunas haja ella stuì trametter davent da la citad veglia, scriva la polizia. Tenor perditgas purtavian ils demonstrants bandieras svizras e per part era tizuns e clamavian «liberté».
Danovamain duvrà gas lacrimogen
Ils demonstrants hajan adina puspè disturbà las controllas e perquai haja la polizia duvrà gas lacrimogen e sajettà cun gumma. Las controllas han cuzzà fin suenter mesanotg. Quellas persunas che n'han betg bandunà immediat la plazza da la staziun, ston quintar ch'i vegnan denunziads.
11 da 12 demonstraziuns betg stadas lubidas
Dapi l'entschatta settember hai dà 12 demonstraziuns ed acziuns d'adversaris da las mesiras da corona a Berna. Cun in'excepziun n'eran tuttas betg lubidas. Er tar quellas demonstraziuns ha la polizia per part duvrà gas lacrimogen e squittas d'aua.
Il directur da segirezza da la citad da Berna, Reto Nause ha tenor indicaziuns uffizialas, survegnì las ultimas emnas numerusas brevs e mails. Il cuntegn da quels giaja per part massivamain memia lunsch, ha declerà la pledadra da la direcziun Alice Späh. La polizia saja infurmada.